Khawvelin a buaipui hri hlauhawm tak leng mek SARS CoV 2, Coronavirus tia hriat lar a len lohna tura beihpui thlak chhunzawm dan tur relin, vawiin khan Tlabung SDO (C) Pu Lalsanglura-hoin Sub-Division Level Task Force an mhukhawm a, he hrileng laka himna tura hmalak mekna an thlirho bakah, hma lak chhunzawm zel dan tur an sawiho a ni.

lhutkhawm kaihruaitu Sub-Division Level Task Force Chairman Pu Lalsanglura, Tlabung SDO (C) ni bawk chuan, Tlabung chu he hrileng laka himna tura beihpui thlak hmasakna pawl a ni tih sawiin, ramri bula awm a nih avangin screening point pawh Mizorama bun hmasak berna pawl a ni tih a sawi a, ram chhungah he hri a len ve lohna turin theihtawp an chhuah tlan a tul tih a sawi.

Senior Medical Officer Dr. R Lalnienga’n he hrileng chungchanga hriattur pawimawh bakah, tun dinhmuna hmalakna an kalpui mek dan a sawi a, vawiin thlengin Kawrpuichhuaha screening point-ah mi 225-te chu he hri an vei a rinhlelhawm awm leh awm loh an endik tawh nia sawiin, tun dinhmunah he hri vei rinhlelhawm an la awm lo niin a sawi bawk.

Thutkhawmnaa telte hian, ramri dep Kawrpuichhuaha screening point awm sa bakah, Tlabung khaw chhunga Licheng leh Missionary Kaiah te screening point dang hawn belh an rel a, helai hmuna duty tur hian Tlabunga department hrang hrang - SDO (C), SDPO, DFO, PHE leh P&E bakah PWD-a thawktute chu a remchan anga pawh khawm tum niin, ramri-a veivakte lo endikna tur khawl Infrared Scanner hi Tlabung SDO (C) Pu Lalsanglura’n a tum dawn a ni.