Tukin Dar 8 khan Mizoram Bharat Scouts & Guides Vice President leh Sport & Youth Services, Tourism Department Minister ni bawk Pu Robert Romawia Royte chu Mizoram Bharat Scouts & Guides 14th State Rally, 2020 ah khuallian niin, rally hi a hawng nghal a ni. Sports, Youth Affairs & Tourism & ICT Development Board Vice Chairman Pu T.C Pachhunga chu khualzahawm a ni. Mizoram Bharat Scouts & Guides 14th State Rally 2020 hi State Training Centre, Tanhril ah Ni 24th-28th February inkara neih tur a ni.

Khuallian Pu Robert Romawia Royte chuan thu sawiin Mizoram Bharat Scouts & Guides ten Rally an neihna hun hawng tur leh khuallian ni tura an sawmna chu lawm awm a ti a, Kum 2009 hnua Mizoram Bharat Scouts & Guides ten rally an neih lehna hmasak a nih avangin, he hun hi Mizoram tan pawh hun hlu tak a ni, tiin a sawi a. Rally a lokal zawng zawng Bharat Scouts & Guides te chuan Scouts & Guides inkaihruaina leh a thil tum bul lian tak tak te an hrechiang tur a ni a, midangte tana nun leh thenawm khawveng te laka tihtur an neih te, midang tanpui tu an nihna te an hre reng tur a ni a, vengchhung, khua leh mahni chennaah teuh midangte puitu an nihna an in theihnghilh tur a ni lo, a ti a. Minister chuan Scouts & Guides te chu khawvel pumpuiah kalphung nghet tak nei, ram hrang leh hnam hrang inkarah a dang lam lo a, inpumkhatna thuikhawmtu pawl lian tak a ni a, sawrkar pawh hian Bharat Scouts & Guides enrollment a tam theihnan hma a lak pawh hi a tih mak mawh a ni a, tan lak pawh a ngai nasa hle a ni, a ti bawk a ni.

Khualzahawm Pu T.C Pachhunga chuan rally-a tel te chu nungcha humhalh kawngah thiante kaihruaitu ni turin a chah bakah nun fimkhur taka hmang turin leh tleirawl lai leh thatlai nun te hmang uluk turin a ngen bawk a ni.
Mizoram Bharat Scouts & Guides 14th State Rally 2020 ah hian Aizawl South, Aizawl North, Aizawl West, Aizawl East, Kolasib, Lawngtlai, Mamit, Siaha, Serchhip, Lunglei atangin tel Mizoram Bharat Scouts & Guides 40 vel zel kal ang an ni a, an vai hian rally ranger, service guide leh officials riak lut te nen mi 407 vel an ni.

Mizoram Bharat Scouts & Guides 14th State Rally 2020 ah hian in elna hrang hrang March Pasts, Folk Dance, Quiz, Pioneering Project, Food Plaza, Pageant Show, Painting Competition leh adangte buatsaih a nih dawn bakah inelna nilo, Adventure activities hlimawm tak hun ruat bikah neih thin tur a ni ang a, base hrang hrang tha taka zo te chu certificate/award pek an ni ang, district inelna ni lovin mimal lawman a ni dawn a ni. Hei bakah hian Rally Friendship Games buatsaih a ni ang a, district hrang hrang a mite thianah siamin an address lak tur a ni ang a, district tel zawng zawng atangin a tlem berah pakhat tal thianah siamin an address lak vek tur a ni dawn a ni.

Rally hi State Chief Commissioner, Mizoram Bharat Scouts & Guides leh Director, Sports & Youth Services Pu Lalsangliana chuan a kaihruai a, Deputy Camp Chief Pu Rosiamliama Ralte chuan Camp Report a pe a, Special Item hrang hrang entir a ni a, Camp Chief Mrs. L.Rohmingthanga chuan lawmthu sawiin he hun hi a khar a ni.