Thla thar, March ni 13-a Chakma Autonomous District Council (CADC)-a village council (VC) 88-a inthlanpui buatsaih tur leh Lai Autonomous District Council (LADC)-a Council Veng VC seat khat hnawh khah nana by-election buatsaih tura presiding officer (PRO) turte chu vawiin khan Lawngtlai DC Conference Hall-ah training pek an ni.

Vawiina training-ah hian PRO tura ruat mi 123 an kal khawm a. Election Officer Pu Lalremruata Sailo leh AERO Pu Hmingmawizuala te'n hriat tur pawimawh hrang hrang hrilh fiahin, an zirtir a ni.

He VC inthlan neih tura chuh tumte tana hming pek luh hun chu nimin tlai khan a tawp a. Vawiin hian hming pek luhte endik nghal niin, inhnuk dawk duhte tan naktuk chhun dar khat thleng hun hawn a ni.

Village Council inthlan turah hian CADC chu sector 18-ah thenin, LADC chu sector pakhatah siam a ni a. He'ng sector 19-a mawh phur tur Sector Officer pawh ruat fel tawh an ni.

CADC-a village council constituency 88-ah hian vote nei 32,213 awmin, general seat 428 leh hmeichhe tan chauh chuh theih reserved seat 88, a vaiin seat 516 a awm a. LADC hnuaia Council Veng Village Council-a term laklawh laia elected member thi a awm avanga by-election neih turah hian voter 1298 an awm thung.