Vawiin chawhnu hian Sub Headquarters YMA Office ah Serchhip Sub-Headquarters YMA hnuaia Media & Documentation Committee te bul tumin Serchhip Town leh a chhehvel Branch YMA chanchinbu enkawltute pualin Media Workshop buatsaih a ni a. Branch YMA Chanchinbu enkawl dan leh dan pawimawh dangte an zir ho. 

He Workshop ah hian Pu K. Saitluanga, MIS, Serchhip District Information and Public Relations Officer chuan “Branch YMA Chanchinbu Enkawl Dan” tih thupui hmangin thusawina hun a hmang a. Pi Lalsiampuii, District Child Protection Officer chuan “Naupang Dikna leh Chanvo Humhalh Dan leh Naupang Venhim dan” tih thupui hmangin thusawina hun a hmang bawk. Thusawituten hun an hman zawh hian kal khawmten hriatchian duh an neih leh an lo tawn tawh thil hrang hrangte sawi hona an nei nghal a. 

He Workshop hi Tv Zonunsanga, Chairman, Media and Documentation Committee chuan a kaihruaia, Secretary Pu R. Lalmuansanga’n Media and Documentation Committee hmalakna hrang hrangte Report a pek bakah Sub Headquarters YMA Secretary Pu Lalrammawia’n thusawina hun a hmang a ni. 

Vawiina Workshop ah hian Serchhip khaw chhunga Branch hrang hrang chanchinbu enkawltute an tel kim hle a, Sub Headquarters YMA President Pu R. Sanghmingthanga leh hotu dangte bakah Serchhip District MJA hruaitute pawhin an telpui a ni.