Zan khat riaka Lungleia rawn zin Mizoram Legislative Assembly hnuaia Committee peng pakhat Subject Committee III member-te chuan an Chairman Pu R. Vanlalvena hovin vawiin khan ‘Spot Visit’ neiin Lunglei District huam chhunga Oil Palm nursery leh Oil Palm chinna hmun te an tlawh. Subject Committee member lo kal te hi Pu R.L Pianmawia, Pu K. Lalrinthanga leh Pu Lalthanliana te an ni.  Subject Committee III te hi Pu J. Lalzamliana, Director, Agriculture Department, Pu C. Lalthlamuana, Deputy Director, Agriculture Department, Pu Lalnithanga, DAO, Pu B. Ramnunsanga, Subject Matter Specialist (Agronomy), leh Pi Lalnunpuii Renthlei, Under Secretary ten an tawiawm a ni.

Subject Committee III hi Oil Palm chinna kawnga Agriculture Department hmalakna hrang hrang zirchiang tur leh oil palm chingtute dinhmun hrechiang tura lo kal an ni. Vawiin Spot Visit ah hian Phairuangkai leh W. Rotlang Nursery-te an tlawh bakah Lungsen khaw bula Oil Palm chinna hmun Saisih Zau Cluster an tlawh bawk. Subject Committee III Chairman Pu R. Vanlalvena leh a thawhpuite chuan ruahmanna fel tak nena Oil Palm nursery leh a chinna hmunte an tlawh thei chu lawmawm an tih thu tarlangin Agriculture Department hotute leh Oil Palm farmer-te chungah lawmthu an sawi a. Saisih Zau Cluster-a kuthnathawktute nen inkawmhona hun hmangin oil palm enkawl dante leh hlawk zawka an tharchhuah theihna tura tanpuina an mamawhte an sawiho a. Chairman Pu R. Vanlalvena chuan kuthnathawktute chu oil palm an chinna leh enkawlna kawngah anmahni rin thu a kal mai lova Agriculture Department mithiamte thurawn ngai pawimawh thin turin a chah a ni. Kuthnathawktute dinhmun chawikang turin sawrkarin hma a la chhunzawm zel dawn a ni tiin Subject Committee III member-te chuan oil palm chingtute chu hmathlir thui tak nei chunga taima taka an oil palm chinte enkawl zui zel turin an fuih bawk.

Saisih Zau Cluster-ah hian chhungkaw 37 in ram hectare 80-a zau ah kum 2015 atang khan oil palm an ching a ni. Heng chhungkaw 37-te tan hian thlam sak sak turin Agriculture Department chuan chak taka hma a lak tur thu Pu J. Lalzamliana, Director, Agriculture Department chuan a sawilang bawk. Tun dinhmunah Lunglei District huam chhungah Oil Palm farmer chhungkaw 1804 ten hectare 6200 vela zau ah Oil Palm an ching mek a ni.

Oil Palm chin kawnga Mizoram sawrkarin a thawhpui mek Ruchi Soya Industries Ltd manager Pu Timothy Laldailova leh a thawhpuite nen pawh inkawmhona hun hmangin Oil Palm chingtute tana an hmalak zel dan tur leh hmachhawpte an sawiho bawk. 

Subject Committee III te hian vawiin tlai khan Lawngtlai District an pan nghal a ni.