Vawiin khan Mizoram Legislative Assembly hnuaia Committee peng pakhat Subject Committee III te chuan Soil and Water Conversation Department hnuaia hmalakna Tuikual River Valley Project leh Tlangnuam River Valley Project a hmunah tlawhin an enfiah. Tuikual River Valley Project hnuaiah hian hna hrang hrang thawh niin Tuikual, Dinthar leh Chawnpui Veng te chu a chhawrtu an ni.

Subject Committee III Chairman Pu Lalrobiaka chuan Soil & Water Conversation Department hnuaia hmalakna te, an dinhmun leh harsatna tawh hrang hrangte zir chianga enfiah tura kal an nih thu leh spot visit an neihnaa an thil zir chu sawrkarah an la thlen leh tur thu a sawi.

Subject Committee III hi an Chairman Pu Lalrobiaka hovin vawiin spot visit programme ah hian member pathum Pu JH Rothuama, Pu John Siamkunga leh Er.Lalrinawma te an tel a. Soil & Water Conversation Department a Joint Director pahnih Pu Hualthanga Chhakchhuak leh Pu K.Kapthuama te bakah Assembly Secretariat a Deputy Secretary Pu C Lalbiakthanga leh Committee Officer Pi Lalhmingmuani ten Subject Committee III member-te hi an tawiawm a ni.