Vawiin khan Lunglei DC Conference Hall-ah Addl DC Pu H.Lianzela kaihhruaina hnuaiah UD&PA enkawl tur ‘Lunglei Town Area Internal Road’ siamna tur Detailed Project Report (DPR) siam dan tur sawiho a ni a. He meeting-ah hian Aizawl atangin UD&PA Director Pu Zorammuana leh Department officials te an tel bakah Lunglei District-a a kaihhnawih tur department hrang hrang officials-te leh NGO aiawhte an tel.

UD&PA Director Pu Zorammuana chuan he project chungchang sawizauna neiin Ministry of Urban Development chuan rampumah khawpui thlan bik 100 te chu ‘Smart City’ ah siam a tum a; UD&PA Minister Pu Zodintluanga rawtna angin Lunglei Town Area chhunga kawngpui siamtha turin UD&PA Department chuan hma a la dawn a ni, a ti a. Lunglei khawpuiin hmelthar a hmuh theih nan Department hrang hrang leh NGO te thlawpna leh puihna a pawimawh hle dawn a, chuvangin DPR siam turah pawh an thurawn leh ngaihdante lakkhawm turin vawiina meeting hi koh a ni, a ti bawk.

‘Lunglei Town Area Internal Road’ hi 10% Lumpsum Grant for North East Region hnuaia tum tur a ni a, tum khatah Cheng vaibelchhe 25 a pel thei loh avangin Project pawh fimkhur leh uluk taka siam tum a ni. Vawiin meeting-ah hian he Project atan hian Core Committee din te, site visit leh joint verification neih te; DC kaihhruaina hnuaiah Road Protection Squad din te, kawng cheithat leh zauh bakah kawng thar siam dan turte pawh enho rel a ni.