Vawiin chawhnu dar 2:30 PM khan Saiha District Bawrhsap Office chamber-ah District Task Force ten Mission Indradhanush chungchangah meeting an nei. He meeting hi Bawrhsap Pu Zarzosanga’n a kaihhruai a ni.

Mission Indradhanush hi Sawrkar Laipui Programme niin, Naupang kum 2 hnuailam leh nu raipuar zawng zawng hnena Vaccine pek kim vek tumna mission a ni a. Mizoram atangin heng district : Lunglei, Saiha, Lawngtlai leh Mamit-ah te hian Mission Indradhanush hi kalpui a ni. He mission hnuaiah hian District chhunga naupang kum 2 hnuailam leh nu raipuar vaccine la lo te hnenah vaccine pek kim vek tum a ni a. A bik takin Health Worker awm loh vang emaw; health worker in long leave a lak vang emaw a Vaccine pek that lo deuhna khua/veng a awm naupang kum 2 hnuailam leh nu raipuar zawng zawng te hnenah vaccine hi pek kim vek tum a ni.

Saiha District-ah chuan April ni 7 khan, he mission hi kalpui tan niin, a round khatna chu zawh tawh a ni a. A round 2-na hi naktuk May ni 7 hian tan leh tur a ni. He Mission Indradhanush round khatna-ah hian Vaccine pekna session vawi -18 neih a ni a; naupang 206 leh nu raipuar 69 te hnenah vaccine pek an ni.

Round khatna-ah hian Nausen thla thum mi vaccine lak tur la kim vek, Fully immunized 44 an awm a, naupang kum 2 hnuailam vaccine lak tur la kim vek Completely immunized 25 an awm.

A round 2-na ah hian vaccine pekna session vawi-23 neih tum a ni a, Naupang 231 te leh nu raipuar 55 te hnenah vaccine hi pek leh tum a ni.