625/2025-2026

Dated Hnahthial, the 15th May, 2025: Subject Committee-III, Mizoram Legislative Assembly member-te chuan an Chairman, MLA, Pu Jeje Lalpekhlua hovin vawiin khan Hnahthial District-ah School of Agricultural Sciences an tlawh a. SAS tlawhnaah hian Chairman bakah Committee member, MLA pali - Dr. K. Beichhua, Pu Lalchhuanthanga, Lt. Col. Clement Lalhmingthanga leh Pu R. Rohmingliana te chu telin Secretariat officials ten an tawiawm a ni. SAS Auditorium-ah hun hman niin chumi zawh chuan SAS hnuaia building sak mekte chu an enfiah nghal a ni.

Pu Jeje Lalpekhlua chuan Subject Committee-III chu India Democracy hnuaia thuneitute inventawnna, principal of check and balance awm theihna tura duante zing ami anih thu sawiin India Danpui, Article 208 hnuaia siam, Rules of Procedure and Conduct of Business in Mizoram Legislative Assembly in a a din a nih thu a sawi a. Chuvang tak chuan member-te pawh ruling leh opposition bench atangin an awm thu a sawi bawk.

Subject Committee-III chu Committee hrang hrang 20 zinga pakhat a nih thu tarlangin an subject-ah Agriculture Department a awm thu a sawi a. Chumi avanga chuan Agriculture Department hnuai ami, School of Agricultural Sciences (SAS) chu rawn tlawh an nih thu leh Assembly-in Budget a pass tak atanga allocated funds hman a nih tawh dan te chu a hmunah enfiah duha rawn kal an nih thu a sawi a ni.

Integrated Training Centre (ITC), tuna School of Agricultural Sciences (SAS) ni ta chu District dangin an neih ve loh a nih thu leh Hnahthial District inchhuanna pakhat a nih thu a sawi a. An mamawhna an lo thlen tawh ang ngeiin zirlaite tan an taksa sawizawina turin Table Tennis board chu hun remchang hmasa berah a hlan tur thu a sawi a ni.

Bawrhsap, Pi K. Vanlalruati chuan he hunah hian thu sawiin MLA ten Hnahthial an rawn tlawh chu lawmawm a tih thu a sawi a. Hnahthial chu District thar a nihna angin duthusama a la changtlun loh thu sawiin office hrang hrang, a bikin Land Revenue & Settlement (LR&S) bakah District Transport Office (DTO) te chu Hnahthial khaw mipuiten an mamawh thu a tarlang a ni.

Pu B. Ramnunsanga, Joint Director, A&FW chuan School of Agricultural Sciences mamawhte tarlangin SAS zirchhuak ten an dil theih - SAS-II, Gram Sevak an tih chu post fill up loh a la tam thu a tarlang a. Chu mai bakah Mizoram Agriculture Service (MAS) chu tun dinhmunah hian Junior Grade post 77-ah post 15 chiah hnawhkhah rih a nih thu a tarlang bawk.

Auditorium-a hun hmanah hian Pi Mary Lallawmkimi, MAS, Vice Principal, SAS Hnahthial chuan SAS chungchang Powerpoint presentation pe in Dr. Evangeline Pari, Instructor, SAS chuan lawmthu sawina in programme hmasa zawk chu a khar a ni.

Hmei zawh hian Spot visit neih nghal niin Infrastructural Support for SAS Phase-II, NABARD RIDF -XXVII (2022-23) hnuaia building leh thil dang sak mek te chu a hmunah endikna neih a ni a. Instructor Quarter(Type -III) (estimate Rs. 150 lakhs); Staff Quarter (Type -II) (estimate Rs. 180 lakhs) ; Boys hostel (estimate Rs. 180 lakhs) leh Guest House (estimate Rs.130 lakhs) sak mekte chu a hmunah endikna an nei a. Committee member-te chuan a hmunah SAS in a mamawh belh turte enfiahin an chhinchiah nghal a ni. Heng building endikte hi luah luh vat theih tura peih fel thuai besei a ni.