Vawiin khan Sports & Youth Services Department buatsaihin I&PR Auditorium-ah 56th Subroto Cup International (U-14) Football Tournament a Champion Mizoram Team-te lawmpuina programme neih a ni a. Sports Minister Pu Zodintluanga chu khuallian a ni.
Sports Minister chuan Subroto Cup chawitute lawmpuiin Mizoram infiamna chuan mel lung pawimawh tak a phun leh ta, a ti a, Mizo faten infiamna khawvelah hmingthatna an lo hlawh zel theih nana sawrkar hmalakna Catch Them Young rah a lang a ni, a ti. Pu Zodintluanga chuan football-a Mizoten hlawhtlinna an chhar mek zel hi sawrkar leh Mizoram Football Association thawhhona rah chhuah a ni, a ti a. Discipline dang dangah pawh Association-te leh sawrkar chuan inzawmna tha tak a neih avangin hma chak takin kan sawn a ni, a ti. Sports & Youth Services Department in Mizo thalaite tana hma a lakna pawimawh tak tak zingah National Cadet Corps (NCC) sawi chhuakin Mizofate zingah hmeichhe pahnihin NCC kaltlanga India sipaiah Commissioned Officer-a an lut chu lawmawm a tih thu a sawi a. NCC hi tih tak taka bei te tan chuan Commissioned Officer luhna awlsam leh tha a ni a, mithiam pui pui zinga exam harsa tak hmachhawn ngai lova interview ringawt paltlanga Officer nih theihna hmanrua a nih avangin thalaiten nga ipawimawh turin a chah a ni. Sports Minister chuan Kolasib Saidan-a Regional Sports Training Centre chhuakten hlawhtlinna an chang chu chhuanawm a tih thu sawiin hetiang Centre dang hi Lunglei leh Champhaiah pawh neih thuai tum a ni, a ti a. Thenzawla Girls Hockey Academy leh Kawnpuia Boys Hockey Academy pawhin infiammi tha tak tak a chher chhuak mek zel a ni, a ti bawk.
U-14 boys Subroto Cup International Football Tournament-2015 champion team te hi Dte. of Sports & Youth Services Deptt. Regional Sports Training Center, Saidan, Kolasib atanga zirte an ni a. Govt. Chawngfianga Middle School Saidan, Kolasib hminga kal an ni.
He tournament ah hian Players te leh Official Pahnih an kal a, chungte chu: R. Malsawmkima, Armed Veng ‘S’; Lallawmkima, Dinthar (Best Goalkeeper); Remlalfaka, Farkawn; R.Lalrinpuia, Kolasib; F. Malsawmzuala, Champhai; Reter Lalsiammawia, Kolasib; F.Lalruatkima, Bairabi (Captain); Hriata Jongte, Armed Veng ‘S’; Norbert Lalfakawma, Kolasib; Lawrence Ngursangzuala, Melriat; Khamlianthang, Seling; MC Zothansanga, Tawipui ‘S’; Remsangpuia, Denlung; Moses Lalrinzuala, Khatla ‘E’; R. Lalrinhlua, College Veng; Chhunga Hmar, Kolasib (Best Player); R.Lalthawmmawia (Coach) leh Lalrinliana Royte (Manager) an ni.
Best Player Award dawngtu Chhunga Hmar, Kolasib chuan Rs. 40,000 leh laptop a dawng a; Best Goalkeeper dawngtu Lallawmkima, Dinthar chuan Rs. 40,000, Best Coach Award dawngtu R. Lalthawmmawia’n Rs.40,000 an dawng a ni. Champion team te hian Championship Trophy leh Rs.2,50,000 an dawng a ni.
Lawmpuina programme hi Sports Director Pu Zothanmawia’n a kaihruai a, Sports Secretary Pu Zothankhuma chu khual zahawm niin Coach R.Lalthawmmawia’n technical report a pe.
