Environment & Forest Department, Government of Mizoram leh tlawmngai pawlho - Climate Action Network South Asia (CANSA), Evangelical Fellowship of India Commission on Relief (EFICOR), Indo Global Social Service Society (IGSSS) leh North East India Committee on Relief & Development (NEICORD) te tangkawpa huaithawt boruak sik leh sa inrawnkhawmna - State Level Consultation Workshop on Climate Change chu vawiin nileng khan NLUP Conference Hall ah neih a ni. Consultation Workshop ah hian sawrkar mi pawimawh te leh Kohhran leh tlawmngai pawl hruaitu thahnem tak an tel a ni.
Consultation Workshop hmanpuitu Khuallian Pu Lalrinmawia Ralte, Environment & Forest Minister chuan thusawiin hmasawnna kara boruak sik leh sa inthlak chho mek chuan mitin a nghawng avangin khawvel ram tin buaipui a nih thu a tarlang a. Khawvela climate zirtu mithiam te chuan kum 15 kalta chhung kha khawvel lum ber hunah ngaiin kum kalta 2014 phei chu khawvel boruak lum ber kuma an ngaih thu te a sawi lang bawk. Boruak sik leh sa inthlak chuan India ram nasa taka a nghawng thu sawiin eibar tharchhuah a tihtlem bakah khaw lum avanga natna hri leng a pun dan te, thlipui, leimin, tuilian, khawkheng leh thil dangte a thlen thin chuan nasa takin mihring nunna leh bungrua a tihchhiat thin dan te tarlangin boruak sik leh sa inthlak nasa lutuk veng turin mitinin mawh kan phur vek a ni, a ti. Climate Change inrawnkhawmna leh zirhona chuan hmalak dan tur fel tak te duanga, rah duhawm tak a chhuah ngei a beisei thu a tarlang bawk.
Consultation Workshop kaihruaitu Pu Lalram Thanga, Principal Secretary & PCCF chuan climate change inrawnkhawmna ngaipawimawha lo kal te zawng zawng chungah lawmthu a sawi a, Mizorama thingtlang loneih dan te leh motor pung chak lutuk te chuan boruak sik leh sa a tihchhiat mek thu te sawiin hmalakna tur kawng thui tak a la awm thu a sawifiah a, hmasawnna ngelnghet nei tura mitinin tan kan lak theuh a tul a ni, a ti bawk. Climate Change chu Sawrkar Laipui ah Ministry of Environment, Forest & Climate Change hnuaia dah a nih angin, Mizoram ah pawh Science & Technology Department hnuaia awm thin chu August, 2015 atang khan Environment & Forest Department hnuaiah dah a nih tak thu te a tarlang bawk.
Programme hi technical session thumah thenin mi thiam chi hrang hrang thusawi leh presentation bengvarthlak tak tak ngaihthlak a ni a. Session tin hi sawihonaa khar nghal zel a ni bawk. Sawihonaah hian Climate change-in kawng hrang hranga harsatna min thlen te lo hmachhawn dan tur leh a tihnep theih nana Mizoram Sorkar leh mipuite hmalak ve dan tur kawng hrang hrang te sawiho a ni.
Hetiang Consultation hi June thla atang khan India ramah ram pum huap leh State huapin a tahtawlin buatsaih thin a ni a, state dangah te pawh la hman chhunzawm chhoh zel tura ruahman a ni. He Consultation-in a tum ber chu Mizoram-in State Action Plan on Climate Change (2012-17) kan neih tihhlawhtlin a nih theih nana thil tul hrang hrang sawiho leh inrawn tlanga, chumi thu chu National leh International level ah hial pawh tarlan leh sawi chhunzawm zel tura chhawpchhuah bakah chuta ruahmanna leh hmalakna kawnga felhlel leh thalo laite dap chhuaha siam that a ni ber a ni.
