Vawiin khan Governor Lt.Gen(Rtd.) Nirbhay Sharma chuan Lengpui Mini Sports Complex ah ni 3 awh tur Anthurium Festival, 2015 hawng in Lengpui Centre of Excellence a neih nghal tur Mizoram Bamboo Day, 2015 a hawng nghal. Governor hian Mau chi hrang 37 chanchin ziahna "Mizoram Mau Chanchin" a tlangzarh nghal a ni.

Anthurium Kut leh Mizoram Bamboo Day,2015 hawnna thusawitu Governor chuan Mizo mipui te zinga awm nuam a tih thu sawiin Mizoram Kut lian tak Anthurium Kut ah a tel ve theih avanga a in chhuan thu a sawi a. Mizo tam takin sum hmuh nana an hman Anthurium pangpar hming chawia Kut siam chu thil inhmeh tak a ni a ti a. He kut leh Bamboo Day hi hmang tangkai ila khualzin tam zawk Mizoram a sawm luh nan a hman rem chan a tha ang a ti a. Mizo hnam zia, ei leh in, incheina, zai rimawi leh lam te chu hnamdang te hnenah mawi taka pho a nih chuan he kut pawh hi a lian telh telh anga rampawn lam mi a hip tam telh telh dawn a ni tiin kut huaihawt tu te leh Mizo mipui te tanlak zual a ngaih thu a sawi.Khualzin hip tur chuan hawihawm taka mikhual dawnsawn leh min hriat chhunzawm reng theih nan khuallian anga mikhual tawh phawt chu dawnsawn a tul thin a ni a ti.

Anthurium Kut nikhatna programme hi Pu V.Lalremthanga, Tourism Secretary in a kaihruai a. Ni khatna a Khuallian, Governor Lt.Gen(Rtd.) Nirbhay Sharma hi Tourism Minister Pu John Rotluanglia'n a lo dawngsawng a ni. Nikhatna-ah hian kumdang ang bawkin mal zai ngaihthlak, hnamlam en leh ennawm chi hrang hrang in kut chhimtu te hi an intihlim a. Kut neihna tual zawl ah dawr chi hrang 58 vel inhawngin Tripura, Assam,Nagaland leh Manipur atanga dawr rawn hawng te pawh an awm a ni.

Attachment

  • Loading attachment...