Vawiin hian Central YLA Hall ah Urban Development and Poverty Alleviation Department (UD&PA) bul tumin Lawngtlai District Urban Swachh Bharat Mission hawnna inkhawm buatsaih a ni a. Khuallian Pu R. Lalsangluaia, Addl DC chuan a hawng.

Khuallian chuan, ti bawlhhlawhtu chuan natna hrik a semdarh a ni tih hi kan thinlung hian vawng reng sela. Kan ram, kan khua, kan chenna in leh a chhehvelte i vawngfai ang u. Mihringten kan bawlhhlawh leh thlite tha taka kan umzui loh chuan kan tui tlante an lo bawlhhlawh lo thei lova, tui thianghlim lo in vanga natna te an lo puang thin. Boruak pawh mihringte siam thil engemaw avangin a lo bawhhlawh thin a, tlang hrileng leh natna dangte an lo inlar chhuak bawk thin. Thil engkim hi a fai leh a thianghlimna ten min hip thin a, khawvel ram dangte pawh kan hmuh ruala an changkang tawk a ni tih min hriat tirtu chu an faina leh thianghlimna bawk hi a ni. Faina chu a man a lo to deuh a nih pawhin a leitute hi an la hlawk zawk tho thin a ni, a ti.

Inkhawm kaihruaitu Pu Lallawmawma, SDO Sadar, District Project Officer, UD&PA chuan Swachh Bharat Mission lo awm chhan leh a thil tumte chipchiar takin a sawi a. Lawngtlai khawpui chhung bika hmalakna tura ruahmanna hrang hrangte pawh a sawi nghal bawk.

An ni bakah hian Pi VL Ramnunsangi, Manager, Social Mobilisation and Institutional Development, Lawngtlai District leh Pu Elvis Lalthangzuala, Chairman, Clean Council Veng ten thusawina hun an hmang bawk a ni.

He hunah hian Lawngtlai khawpui chhung atanga thlan bik mi 400 vel an kalkhawm a ni.