Chief Minister Pu Lal Thanhawla chuan ‘Sum hi a tam pawhin a tlem pawhin, hman dik hi kan tum tur a ni’ a ti. He thu hi vawiina Mizoram State Planning Board buatsaih, Brainstorming Session for Formulation of 12th Five Year Plan tih sawihona Aijal Cluba neiha a sawi a ni.

Chief Minister chuan Indian economy chu Plan Economy anih angin 11th Five Year Plan chu hman zawh anih dawn tak avangin 12th Five Year Plan (2012 - 2017) kan hman turah felfai taka inbuatsaihna kan neih theih nan sorkar hotulu, senior officers te leh department hrang hrang hotuten, hmathlir an neih te, kalphung tha zawk tur leh ngaihdan an neihte zalen tak leh zau zawka sawihona hun nei tura kalkhawm an nih thu a sawi a. Chief Minister chuan Indian economy thangduang tak chu Mizoram pawhin a zar kan zo ve a ni tiin, kawng tam takah erawh duhthu sam a tlin tawk lohna lai te a ni a ti a. Chutiang laite chu enin, 12th Plan ah engtinnge nasa zawkin kan kal anga, engtinnge Plan hi changtlung zawkin kan kalpui theih ang tih kan ngaihtuah tlan a ngai a ni a ti a. Mizoram chu state naupang ber te zinga mi, infrastructure lama hnufual bik kan nih avangin tan nasa taka lak ngai a ni a ti.

Chief Minister chuan 12th Five Year Plan chhunga Mizoramin kawng hrang hranga hmasawnna tihpuitlin ngai a neihte a sawilang a. Chung zinga pawimawh zual te chu power supply hnianghnar zawk neihte, inkalpawhna kawngpui tha zawk, khualzin mi leh investment hip thei tur ruahmanna felfai siamte, tui thianghlim in tur hnianghnar zawk siamte, hriselna lam nasa zawka chawikan, resource kan neih ang angte daihzai leh tangkai zawka hmante, development department ten hmasawnna chak zawka a kal theih nana research uar zawka kalpui tul a tih thu te, thiamna chherchhuak tura skill development uar chhoh te, zirtirtute tan training tam zawk buatsaih te, Agriculture leh Horticulture lama training neih uar taka kalpui te,thingtlang leh khawpuia ruahtui khawl pawimawhna in zirtir te leh thil tul dang tam tak  he Plan chhunga kalpui turte a sawi a. Pu Lal Thanhawla chuan Mizoramin kan mamawh ber chu Lal Isua leh Moral Reformation a ni a ti a. Hengte hi 12th Plan ah kalpui theih  dan awm se a duhthu a sawi bawk a. He hun pawimawh tak, ngunthluk taka 12th Plan sawihonaah hian rilru inpawh tak leh ram leh hnam tan a ni tih hria a, zalen tak leh zau taka sawihona nei turin sorkar hotute leh senior officers kalkhawmte chu a sawm a ni.

12th Five Year Plan in a tum ber chu kum lo awm tur chhunga chak zawk leh hmasawnna tluantling leh huapzo neih a ni a. Sawihona hi Chief Minister Pu Lal Thanhawla hian a kaihruai a. Department tin hotu ten hmathlir an neihte, kalphung tha tur nia an hriatte leh kal dan tur ruahmanna an neih te sawiin, harsatna an neihte leh a sutkian dan tur leh tul dang an tihte an sawi a ni. Session thumna thleng neiin a tawpna ber hi Pu H. Liansailova, Finance Minister etc in a kaihruai a ni.Sawihonnah hian Ministers, Speaker, Dy Speaker, Parliamentary Secretaries, MLA te leh Senior Officers, Head of Department te an tel tha hle a. State Planning Board Vice Chairman Pu Lalkhama’n inlawmna thu sawiin, Pu P.L.Thanga, Member & Secretary, Planning Board in Power Presentation a nei bawk a ni.