Minor Irrigation Minister Pu Lal Thanzara chuan Mizoram hi a thlawna sum luangral tam lo se chuan ram hmasawn tawh tak tur a ni a; sum hmanral leh hnathawh a inmil em tih enfiah fo thin hi a pawimawh, a ti. He thu hi vawiina Minor Irrigation Staff Welfare Association Mizoram (MISWAM) General Body Meeting vawi 4-na, Beraw Tlang Art & Culture Auditorium-a neih a hmanpui naa a sawi a ni.

Minister chuan Minor Irrigation Department chu kuthnathawktute chawmtu ber pakhat a nih angin, an tan malsawmna ni thei tura theih tawp chhuah a thawk zel turin kalkhawmte chu a chah a. Sorkar hnathawktu thenkhat zingah midang chanpual lo phut ve tlat thin te leh, kut tlinglo a sum neih tum ten midang tan harsatna siam mai bakah, kut tlinglo a sum lalut te reng reng an hlawk ngailo a ni, a ti a. An hnathawhna hmun theuhvah rinawm taka thawk turin Minister chuan Minor Irrigation Department thawktute chu a chah a ni.

He hun a thusawitu dang Pu R. Rohnuna, Deputy Secretary, Minor Irrigation Dept. chuan dan leh hrai hriatchianloh vanga thil tihsual awm palh thin te veng turin Sorkar hnathawkten an mawhphurhna an hriatchian a pawimawh thu a sawi bawk.

Vawiin MISWAM General Body Meeting-ah hian Er. Lalthanliana, C.E. leh MISWAM Chairman ni bawk chuan kalkhawmte lawmna thu a sawi a, programme hi Er. Laldingliana, S.E. leh MISWAM Vice Chairman ni bawk in a kaihruai a ni.

MISWAM General Body Meeting hi kum khat dan a neih thin niin, kumin hian Minor Irrigation Dept. Rising Day-a hman a ni a. Chawhnu lamah report sawihona leh inthlanna in a chhunzawm a, inthlanna hi Mizoram Engineering Service Association (MESA) Office Bearer-ten an hmanpui a ni.