Vawiin chawhnu khan Assembly House (annexe) Conference Hall-ah Chief Minister Pu Lal Thanhawla hovin “Special Leadership Seminar on Good Governance” neih a ni a. He seminar hi Mizoram sorkar leh Haggai Institute Alumni Association, Mizoram buatsaih niin Haggai Institute, India a Dean of Faculty ni mek Dr Ramchandran Rajkumar chu Resource Person a ni.

Chief Minister chuan Mizoram hi Kristian ram tiin kan sawi thin a, a chhunga cheng ten kan rilru puthmang, kan mizia leh thiltih apiangah mite tana entawntlak kan nih a tul, a ti. Sorkar hnathawk leh mipui rawngbawltute’n min kaihruaitu leh kan zawm tur dan kan nei theuh va. Ringtu kan nih chuan kan awmna hmun apiang hi rawngbawl tura Pathianin min dahna hmun a ni tih pawm a tul a, chuvangin kan hna chelh laiah theuh hian tui leh taima taka kan thawh hi ringtu kan nih anga kan mawhphurhna a ni, Chief Minister chuan a ti.

Right to Information (RTI) Act leh information technology kaltlangin sorkar chuan mipui hnenah thuneihna a pe a, facebook leh social media dangte kaltlangin thalaite pawhin an ngaihmawh zawng an auchhuahpui thei ta a. Heng te hi sorkar inrelbawlna fel leh tha nei tur chuan thil tangkai tak a ni, a ti a. Ram hmasawn nan sorkar tha a pawimawh a, khua leh tui ten duhtlanna zalen taka an hman theihlohna ram chuan hma a sawn thei lo, a ti bawk. Pu Lal Thanhawla chuan ram hmasawnna tur ki pawimawh ber chu thingtlang tih hmasawn a ni a, an ni an retheih chhung chuan eng ram mah a hausa thei lo, a ti a. Sorkar tha nei tur chuan a rawngbawlsak mipuiten mahni inrintawkna nen hlim leh thlamuang taka an khawsak theih a tul a, chuvangin mi rethei ten leirem an rah theihna tur sorkarin NLUP a kalpui mek hi sorkar tha nei turin thil pawimawh tak a ni, a ti bawk.

Dr R.Rajkumar hian thupui thlanchhuah “Biblical perspective on Good Governance” hmangin thu a sawi a. Seminar-ah hian Council of Ministers, Speaker, Deputy Speaker, Parliamentary Secretaries leh MLA te bakah officer lian engemawzat an tel. Chief Minister Pu Lal Thanhawla hi he seminar thlengtu (host) a ni a, Haggai Institute, Hawaii-ah kum 1994 khan thla khat chhung zet training tawhin vawiin ni thleng hian he Institute member hi a ni zui a ni.