MOS Pu Lal Thanzara, President, Mizoram Football Association ni bawk chuan vawiin chawhnu dar 2:00 khan MFA Annual General Body Meeting, Tourist Lodge, Chaltlang ah a hmanpui a, kum kalta chhunga MFA hmalakna leh hlawhtlinna hrang hrang te tarlangin mawhphurtu leh hma la tu zawng zawngte chungah lawmthu a sawi.

Mizorama Football Stadium hmasa ber lammual-a phullem phah leh mipui thutna gallery mawi tak sorkarin a buatsaih avangin lawmthu a sawi a, a enkawl leh humhalh mawhphurhna sorkar-in MFA kuta a hlan chu thil chhinchhiahtlak tak a ni, a ti. Ram pum huap All India Football Federation (AIFF) Technical Committee Member ah Pu Lalnghinglova Hmar, Hony Secretary, MFA ruat a ni chu lawmawm tiin MFA tan rahbi thar pawimawh tak a nih thu a tarlang bawk. India rama state football inelna lian ber National Football Championship for Santosh Trophy ah Mizoram a champion thei te, National Junior Football Championship for BC Roy ah Mizoram an champion thei te, Dr T.Ao Memorial North East Football Tournament ah Mizoram a champion thei te, AIFF-in Mizoram chu Best Grassroot State-a a puan te, German Football team lar takin Mizoram an rawn tlawh te chu Pathian hruaina leh MFA member te thawhhona rah a ni tiin Pu Lal Thanzara chuan sorkarin infiamna hmunhma leh mamawh te changtlung tak a buatsaih zara heng hlawhtlinna ropui tak tak te hi chang thei an nih avangin sorkar chungah lawmthu a sawi bawk.

Vawiin-a MFA General Body Meeting hi Chief Patron Pu Lalhmingliana, MP (Rajya Sabha) pawhin a hmanpui a, Santosh Trophy Champion team member te hnenah chawimawina leh lawmpuina thilpek hlan an ni bawk a ni.