Mizoram mipui te hian sum peipunna tha leh him chungchangah zirtir kan mamawh a, company invuah chawp ten sum peipunna tha leh hlawk ni awm anga lang hmangin mipui pawisa nuai tam tak an lo laksak tawh thin a, chuvangin huamzau zawka zirtirna inpek hi Mizo mipui ten kan mamawh hle a ni, Parliamentary Secretary Pu Lal Thanzara chuan a ti.
He thu hi Mizoram Consumers Union leh National Stock Exchange of India Ltd. te tangkawpin sum peipunna lama hriatzauna seminar, Hotel Ritz-a an buatsaih hawnna inkhawmah a sawi a. Pu Lal Thanzara chuan khawvel hmasawn zelah Mizoram pawh bang bik lovin sumdawnna chi hrang hrang lian tak tak te a lo lut chhova, tunhmaa Mizote hmelhriat ngai reng reng loh sum peipunna company chi hrang hrangte an lo lut a. Rual u zawk te chuan sum peipunna an hmelhriat chhun chu Bank leh Postal Service kaltlanga Fixed Deposit leh Savings Account te a ni mai a, tun hnai lawkah thalai lehkhathiam ten mutual fund, stock market leh a dangte hmangin sum peipun nachang an lo hre ve ta a. Chuvangin hetiang lam kaihhnawih hriatzauna seminar an buatsaih chu a finthlak hle in a tangkai hle dawna a hriat thu Parliamentary Secretary chuan sawiin he seminar-a an thil hriat thar te mipuite hriat tura a zau thei ang bera thehdarh turin kalkhawm te a sawm a ni.
Seminar hawnna inkhawm hi MCU Executive member Pu Vanlalthlana’n a kaihruai a. National Stock Exchange of India Ltd.(NSE), Kolkata-a Manager Pi Aditi Bhowmik leh National Securities Depository Limited (NSDL), Mumbai-a Manager Pu Soumik Majumder te chuan thupui thlan bik hmangin kalkhawm te an zirtir a. MCU General Secretary Dr Chawngsailova’n lawmthu sawiin hun hnung a khar a ni.
