Vawiin chawhnu khan Supply Minister Pu John Rotluangliana hovin a Office Chamber-ah Mizorama National Food Security Act 2013 hman hun tur leh tlangzarh (launch) hun tur te FCS&CA Secretary, Director leh Official dang te, DCSO te leh NIC/WIPRO Official te nen an rel.
Supply Minister Pu John Rotluangliana chuan Food Security Act (FSA) hman tan a nih thuai theih nana Department mite thawhrimnaah lawm thu a sawi a. FSA chu peih fel thawkhat ni tawh mah se, buhfai allocation hi thla laklawhah pek a nih thin loh avangin February thla laihawl atang chuan hman a remchang dawn lo va, March ni 1 atanga hman tan tur a nih thu a sawi.
He meeting-ah hian FSA tlangzarh hun atan February ni 25, 2016 chu tin zawn niin, Chief Minister Pu Lal Thanhawla chu tlangzarh tura sawm ni se tih a ni a. FSA hi hman a nih hunah chuan Ration Card rawng chi thum hman tur a ni dawn a, buhfai man pawh a tlak hniam tur thu te sawi lan a ni.
Meeting-ah hian District hrang hrang Civil Supply Officer-te chuan NFSA 2013 hmang tura an hma lak tawhna leh an dinhmun final report an pe a. NIC/WIPRO Official-te chuan Targeted Public Distribution System (TPDS) computerise tura an hma lak dan report pein, Data Base, Online Allocation Module leh Online Grievance Module pawh peih fel thawkhat a nih tawh thu an sawi a ni.
