Nimin chawhnu khan ‘Regional Agriculture Fair 2016’ kharna chu College of Veterinary Sciences and Animal Husbandary, Selesih-ah neih a ni a. State Planning Board Vice Chairman, Pu H. Liansailova chuan khuallian niin he hun hi a hmanpui a ni.

Khuallian, Pu H. Liansailova chuan ‘Regional Agriculture Fair 2016’ hlawhtling taka neih zawh a ni ta chu lawmawm a tih thu sawiin kuthnathawktuten he hun hlu tak hi thlai tam zawk thar chhuak thei tura rahbi pawimawhah hmang thei se a duhawm hle a ni, a ti a.  Khuallian chuan he inkhawmah hian lehkhabu te (Booklet) pathum – Saptawng leh Mizotawnga ziak, ranvulhte natna tlanglawn ziahna, ‘Common diseases of livestock’ tih leh lo neih dan changkang zawk zirna ‘Further cultivation guide’ tihte chu a tlangzarh a. Khuallian hian stall hrang hrangte a fangkual bawk a ni.

Khualzahawm Dr. Abhijit Mitra, National Research Centre on Mithun Director chuan India hmarchhak biala kan sial neihte chu humhalh a tul a, kawng hrang hranga kan chhawr tangkai thiam pawh a pawimawh hle a ni, a ti a.

Khualtha, U.P. Veterinary University Vice Chancellor, Dr. A.C. Varshney-a chuan lehkha kan inzirtir dan chu thlak danglam a tul tawh tih sawiin, industry-te nena tangkawpin zirlaite an zir zawh ruala an hna thawh tur kan siamsak hi a tul a ni, a ti bawk.

CAU Imphal-a Deputy Director of Extension, Dr. Angad Prasad chuan Organising Committee aiawhin report a pe a. Kuthnathawktu mi 6,287 laiin Fair hi an tlawh tih tarlangin, beisei phak bakin mipuiin an hlut a ni, a ti a. Kuthnathawktu mi 122 lai chu Mizoram pawn atanga rawn tel an nih bakah, pawl hrang hrang 50 lai-in he Fair hi an chhim ve tih a tarlang tel bawk.

Central Agricultural University, Imphal hnuai a college, Arunachal Pradesh, Manipur, Meghalaya, Nagaland, Sikkim leh Tripura-a awmte leh Mizoram sawrkar hnuaia Department hrang hrangten thiam thil an pho lang a. Department of Agriculture (CH), Govt. of Mizoram, stall siam chu stall awm zawng zawng, 46 zinga tha berah thlan niin  lawmman pakhatna hlan a ni.

Fair neih zawh takah hian inelna chi hrang hrang buatsaih a ni bawk a. Ui, naute, theirah, thlairah, pangpar leh thiamthil chi hrang hrang bakah, thlaithar sawngbawl dan leh farmers innovation show-ahte inelna siamin pakhatna atanga pathumna thleng lawman pek zel a ni a. Stall siamtu zawng zawng hnenah certificate hlan a ni bawk.