Nimin tlai khan Lungleng Community Hall-ah, Pachhunga University College (PUC)-in ‘Adopted Village’ (khaw chuam) atana Lungleng khua a thlan puanzarna neih a ni a. Higher & Technical Education Minister, Pu R. Romawia’n khuallian niin a hmanpui.

Khuallian, Pu R. Romawia chuan thu sawiin PUC-ten ‘khaw chuam’atana Mizorama khaw hlun berte zing a mi, Lungleng khua an thlang chu a inhmeh hle a ni, a ti a. Mizoram chanchina Lungleng khaw pawimawhna hrang hrangte tarlangin Minister chuan, Lungleng khua chu Mizo lalte zinga lal fing leh remhria, hmathlir thui tak nei, Khamliana din a ni a ti a. Khamliana chu rilru nghet tak leh Mizoram khua zawng zawnga khaw intodelh ber nih tum tlat thin a ni tih sawiin Lungleng khaw mipuite chu chutiang rilru pu tur leh Mizoram pumpui ‘Khaw Idol’ ni thei tura ‘khaw chuam’ an nihna hmang tangkai turin a chah bawk. 

Minister chuan hmasawnna tak tak tura ruahmanna siam tur chuan statistics dik leh rintlak a pawimawh  zia sawiin PUC-te hmalakna zarah Lungleng khaw nihna dik tak chu kan hre thuai dawn a. A chhe lam lo lang te pawh mualphonaa ngai mai lova khawtlang tan kawng tha zawk in kawhhmuh nan hmang thiam tur leh ‘Aizawl khawpui pawh Lungleng khaw tello chuan a awm tak tak thei lo,’ tih tur khawpa khaw pawimawh ni tura tan la turin khaw mipuite a sawm bawk.

Village Adoption puanzarna inkhawm hi PUC Vice Principal, Village Adoption Committee Chairman ni bawk Prof. J.V. Hlunan a kaihruaia. PUC Principal Dr. Tawnenga chuan thu sawiin an hmalak dan tur hrang hrang a tarlan bakah khawvel dangte ruala Lunglengin ke a pen theih nan khaw mipuite chu thawhho puiah kan sawm che u a ni, a ti a. Village Adoption Project hmalakna hmasa ber atan Principal chuan Computer Set leh Sunflower Electronics-in PUC Village Adoption Project atana an thawh ve, printer chu Lungleng khawtlang hruaitute hnenah nghal bawk.

Lungleng khaw VCP Pu Lalthanpara pawhin thu sawiin PUC-in Lungleng khua ‘Khaw Chuam’ atana an thlang hi khawtlang kan lawm a. A theih ang zela thawpui turin mipuite pawh an inpeih reng a ni, a ti a. Lungleng ramchhunga pipute hmunhlui pawimawh zualte bakah puk lian leh langsar thenkhat tarlangin, Lungleng khua chu hmun pawimawh tak a nih thu a tarlang bawk.

Village Adoption Committee Secretary Dr. Lalramliana, Assistant Professor chuan Village Adoption Project kalpui a nih dan leh a thiltumte a tarlang a. Dr. Zoramdinthara leh Dr. H. Lalruatsanga ten ‘Thianghlimna leh Hriselna’ chungchang leh “Ramngaw leh Tuihna humhalh’ dan turte mipuite an zirtir bawk.

PUC hian Village Adoption Project hi kum 2012 atangin a kalpui tan a. Kum 2012-2013 chhunga ‘khaw chuam’ atan Phulpui khua thlangin hma an lo la tawh a. Phulpui khua an zirchianna leh an hmalaknate chu ‘An Insight Into Phulpui’ tih lehkhabuah an lo chhuah tawh bawk a ni. Village Adoption Project atan hian PUC-a zirtirtu zawng zawngten pawisa an thawhkhawm thin a, chu an sum thawhkhawm hmang chuan an ‘khaw chuam’ harsatna tawh mekte zirchiangin ei leh bar, zirna, hriselna leh thianghlimna kawngah te an hmasawn theih nan an puih thin bakah pipute sulhnu hlui humhalh kawngah te leh ramngaw leh tuihna humhalh kawngah te mipui zirtirin hma an la thin a ni. Village Adoption Project hi India President, Pranab Mukherjee-a pawhin tha a ti em avangin college leh university dangte pawh hma la ve turin a sawm hial a ni.

Minister hi Sports & Youth Services Department Secretary, Pu Zothankhuma, IAS leh INTACH Mizoram Chapter-a hruaitu thenkhatin an tawiawm bawk a ni.