Nimin khan MIFCO Chairman Pu P.C. Zoram Sangliana, MLA chuan Chhingchhip-a MIFCO sapthei tui herna khawl enin loneitute nen inkawmna hun an hmang.

MIFCO Chairman chuan sapthei herna khawl cu endikin sapthei her sa dahthatnate a en pui a. Sapthei chin chu eizawnna tha tak nia a hriat thu sawiin loneitu hlawhtling a hmu chuan a ti phur hle a ni, a ti. Ramdang atanga leina tur man zat rawn bituk tawh lova a thar chhuaktute ngeiin an duh zat an chhiar ngam theih nan tun aia nasa zawk a tan la tur leh thar hnem lehzual turin a fuih a. Loneituten an tharchhuah atanga hlawkna an seng hi kan duh ber a ni tiin Pu PC Zoram Sangliana chuan sorkarin an hmakhua ngaia theihtawp a chhuah reng thu a sawi bawk.

MIFCO General Manager Pu Zosangliana’n sapthei chinna huan zawng zawng chu MIFCO official leh VLNC/ VCP ten an endik vek thin a, tanpuina pawh an endikna report ang zel a sem a ni, a ti a. Taima taka thawkten rah an seng mek chu lawmawm a tih rualin hma tha taka la chhunzawm zel turin a chah nghal a ni.

MIFCO Deputy Manager (Tech) Pi Lucy Zirsangzeli report atanga a lan danin Tuikum Constituency chhung atangin sapthei ching tur khaw 11 thlan chhuah niin, NLUP-RKVY Convergence Scheme hnuaiah MIFCO chu Project Implementing Agency (PIA) a ni a. RKVY leh NLUP tangkawp hnuaiah mi 500 awm in, NLUP hnuaiah mi 112 an awm bawk. Kumina captive farming hnuaia loneitute atanga sapthei lei tawh zat chu quintal 428.74 niin, Suangpuilawn atangin quintal 1448.37 an lei tawh. Italian siam khawl tha tak Fresh Juice Concentrate Plant (FJCP) bun a ni a. Kumin chhung hian sapthei litre 38,207 her chhuak tawh in, litre 35,375 dah that mek a ni bawk.

MIFCO Chairman leh amah tawiawmtute chuan Tuikum Cluster khaw 11-te bakah Suangpuilawn khua atanga lokal loneitute nen inkawmkhawmna hun tha tak an hmang a, harsatna thenkhatte an thlen nghal a ni