Vawiin khan Kolasib DC Conference Hall ah Supply Minister, Kolasib bialtu MLA ni bawk Pu K.Lalrinliana hovin Kolasib District chhunga Sawrkar Pisa hrang hrang hotute inkawmkhawmin Kolasib District hmasawnna tura thawhho dan tur an sawiho a, Minister hi Serlui bialtu MLA Pu Lalrinsanga'n a tawiawm a, Sawrkar pisa hrang hrang hotu 42 an tel a ni.

Minister chuan Department hotute chu Kolasib district huamchhunga Sawrkar department hrang hrang ten hmasawnna hna thawh kawngah eng harsatna nge an neih a, chak zawka ke pen theihna tur atana tangkai engte ni tih ngaihtuahho tura inhmuhkhawm hi buatsaih anih thu a hrilh a, sawrkar tharin thahnemngai taka hmalak a tum a Department tin ten hmasawnna hna thawhna tur project an siam taimak a pawimawh dawn a ni a ti a, an inkawmhona hian awmzia nei ngei se, hmasawn phah nan hmang ila, kan hnathawh kawngah pawh inpawhna tha neih phah nan i hmang ang u tiin theihtawpchhuah a thawhpuiah a sawm a ni.

Minister hian kutnathawktuten an tharchhuah te an phurhchhuahna tur kawng a pawimawhzia sawrkarin a hria a, hemi chungchang bik buaipui tur Link Road Board pawh siam tum ani a ti a, Department hrang hrangte chu an mamawh leh hmalakna tur atana an ruahmanna te January thla ral hma a ziak a a hnena thehlut turin a hrilh a, lo zirchian a ram hmasawnna tur ngaihtuah chunga theihtawpchhuah a bawhzui a tum thu a sawi a ni.

Serlui bialtu MLA Pu Lalrinsanga pawhin thusawiin sawrkar hnathawkte hi Mizoram tun dinhmun min hruai thlengtu leh tun aia hmasawna ke min pen pui tu tur te an nih vangin an pawimawh em em a, Kolasib pa ngei mai Minister kan nei bawk a, thahnemngai leh District hmangaih takin hna kan thawk tlang ang a, district hmasawn leh entawntlak kan ni ngei ang a ti a, sawrkar hnathawkte chu an hnathawhna hmun a awm tha tura chahin hmasawnna hna thawh kawngah na taka kal kan tum a ni a ti.

Vawiin thutkhawmah hian Kolasib District a sawrkar department 42 ten an hmalakna te, an induhkhawplohnate an hmachhawpte an sawi ho a, a tlangpuiin thawktu indaihloh vanga harsatna a tam ber a, hei bakah hian 1st IR Battalion, Mualvum a sipai indaihlohna te, Excise & Narcotics Department a sipai indaihlohna te pawh a theih ang ang ahma lak mek anih thu in Minister hian a sawi a, heng bakah hian department hrang hrang ten harsatna an tawh an sawite chu chhinchhiahsakin a tul anga bawhzui anih tur thu a sawi a ni.