No.6450/2020-2021

Aizawl, the 5th November 2020 : Zanin dar 6 bawr vel khan Mizoram Sawrkar tirh a Manipur atanga eirawngbawlna gas phur motor 3 te chu tluang takin Aizawl an lo lut a, heng motor leh a khalhtute hi Food, Civil Supplies & Consumer Affairs Minister Pu K. Lalrinliana leh  Veterinary, Fishery and Sericulture Board Vice Chairman Pu C. Lalmuanpuia, MLA leh Sawrkar mi pawimawh dangten an lo dawngsawng a ni.

Pu K Lalrinliana chuan ramri buai avanga state thenawm atanga mamawh chawkluh kawngah hian Mizo hmun hrang hrang awm te tanrualna leh hmangaihna a lang chiang hle niin a sawi a. Tangrualna leh inhmangaihna tichak zel tura Mizoram chhung leh Mizoram pawna Mizo mipui chengte chu ngenin an chunga an tawiawmna zawng zawngah lawmthu a sawi. Minister chuan Sawrkar ruahmannaa Manipur atanga gas phur tura tirh a kal hmasa ten Aizawl an lo thleng chu te an chhuanawm thu sawiin thahnemngai takin hnam tana fehchhuak te in ni a,  kan chhuang tak zet cheu ni, a ti a. Ei rawngbawlna gas leh tuialhthei phur turin Sawrkarin in motor tirh zel a tum thusawiin  truck engemaw zat tir leh turin Department in inbuatsaihna a kalpui mek a ni, a ti.

Sorkar hmalakna ah hian Mizoram leh Manipur a Kohhran hrang hrangte tawngtai naah te, Mizoram leh Manipur a tlawmngai pawl leh zirlai pawl hrang hrang te tawiawm naah te,hmun hranga hrang awm Zohnahthlak atanga duhsakna leh thlamuanna awka dawn ah te, IOCL ruahmanna te leh Manipur Sawrkar puihnaah te Mizoram Sawrkar aiawhin Minister chuan lawmthu a sawi a ni.

He hun tawite hi Dr.Lalhriatzuali, Director, Food, Civil Supplies & Consumer Affairs chuan kaihruaiin Pu C. Lalmuanpuia, MLA chuan tawngtaina hun a hmang a. Driver leh handymen 6 te chu lawmthu sawina lehkha ziak leh thangchhuah diar Minister chuan an hlan a. IOCL aiawh te leh Gas Agency pathum - MIZOFED Gas Agency, V. Neihkunga Gas Agency leh Police Gas Agency te pawh lawmthu sawina hi hlan an ni bawk a. Pu John Neihlaia, IPS, IGP pawhin thu a sawi a ni.

Tum tum ah hian Gas Agency 3 - MIZOFED Gas Agency, V. Neihkunga Gas Agency leh Police Gas Agency te chuan an motor tirin Sekmai Bottling Planta atanga eirawngbawlna gas trip khat theuh an lo phur lut a. Kawng lakah oil phur tanker 5 an thang mek a, naktuk Aizawl an lo thlen beisei a ni a.

Eirawngbawlna gas phur motor-te lo hmuah naah hian AMC Deputy Mayor Pu Lalringliana, AMC hotu dangte, MIZOFED hotute, IOCL aiawh te, Gas Agency association hruaitute leh Thuampui Local Council hruaitute an tel a ni.