Vawiin khan Mizoram Govt. Supply Storekeepers’ Association (MGSSA) chuan General Conference vawi 14-na Tourist Lodge, Chaltlang-ah an hmang a, FCS&CA Minister Pu H. Rohluna chu Khuallian niin Conference hawnna inkhawm a hmanpui a ni.
 
 
Mizoram hmun hrang hrang atanga Conference hmang tura Storekeeper kalkhawmte hmaah Minister chuan thu sawiin sorkar department zingah Supply Department chu mipuite ngheng hnai bertu a ni a, chuvang chuan a hnathawkte thawh that leh that lovah department hmel that leh that loh a innghat a ni, a ti. A bik takin Supply Storekeeper-te phei chu Mizoram mipuite buhzem enkawltu an nih avangin mipuiten an lakah beiseina sang tak an nei a, an hnaah rinawm leh taimak a pawimawh leh zual a. Inthlahdah theih an nih loh thu sawiin Minister chuan thawk thate chu chawimawi tur an nih rualin thawk tha lo leh Dan anga kal lote chu an phu tawka hrem chu sorkarin a hreh dawn lo a ni, a ti bawk. Consumer-te hamthatna tur ruahman a nih rual rualin anmahni rawngbawltu sorkar lam emaw mimal sumdawng lamte pawhin consumer-te laka an mawhphurhna hre reng chunga mipui rawngbawlna chu thahnemngai taka hlenchhuak tur an ni, Minister chuan a ti.

A sawizelnaah Minister chuan APL buhfai kham loh avangin economic cost-in buhfai lei belh a nih thin thu a sawi a, mipui hnenah subsidised rate-a buhfai hralhchhuah a nih avangin Mizoram sorkar chuan thla tin cheng vaibelchhe 9.68 vel a hloh a ni tih a tarlang a ni. Mizorama buhfai dinhmun, a renawmzia leh a hlutzia, tihchingpen chi a nih lohzia hre rengin an hnaah dik leh fimkhur taka thawk zel turin Minister chuan Storekeeper-te a ngen.

Vawiina Supply Storekeeper Conference hi MGSSA President Pu H. Lalduhawma’n a kaihruai a. FCS&CA Jt. Director Pu Rokunga Ralte pawin Storekeeper-te an hna chungchanga an hriattur pawimawh thil hrang hrang a tarlang a, an awmna hmun theuhah mipuite tan thahnemngai leh zuala thawk zel turin a chah.

MGSSA Conference vawi 14-naa Agenda zingah Sub-Inspector post abolish-a kai chhohtir vek te, Service Rules tha tak neih theih nan chak zawka hmalak te, Centre tina bungrua leh furniture mamawh phuhruk leh Manual thlirzauna chungchang rel a ni.
 
 

Attachment

  • Loading attachment...