Vawiin chawhma khan Food, Civil Supplies & Consumer Affairs Department changtu Minister Pu H. Rohluna Pisa-ah ama hovin IOC General Manager Guwahati, Pu Priobhash Dey, North East bialtu leh Pu L K Doley Senior Area Manager IOC Silchar leh Aizawl lama LPG hotute nen meeting an nei a. Meeting-ah hian Food, Civil Supplies & Consumer Affairs Department, Secretary Pi M. Zohmingthangi, IAS pawh a tel a ni.
Pu H. Rohluna chuan Mizoram leilung leh kalkawngten a zir loh avangin IOC dan leh dunte anih ang diak diaka zawm theih anih loh avangin Sorkar hriatpuina in Mizoram Gas Distributors-te chu gas sem dan kalphung inkaihhruaina (Instructions) pek an nih thu a hrilh a, hei hi company lam pawhin lo hriatpui ve turin a ngen a. Mizoram Gas Distributor-te harsatna hi tunhnaia Delhi-a a zin khan Union Minister pawh a sawipui thu IOC hotute hi a hrilh bawk.
Minister chuan IOC lam atanga Gas Supply duhkhawp anih lo vangin consumer-ten chang theuh se tiin leh rualkhai taka sem anih theih nan Chhungkaw khatah Cylinder pakhat zela sem rual thin anih thu IOC hotute hi a hrilh a. Chuvangin Agent ten Gas an rawn semin Local Council/Village Council/Consumer Union/YMA te lo enpuia lo hriatpui thin tura tih an nih thu a sawi a, hemi avangte hian Refill Booking System hi chu Mizoramah a taka kalpui theih a nih loh thu a hrilh bawk. Home Delivery tih a harsat avangin Common Point Delivery System kalpui a ni a ti a. LPG man hi Sorkar-in a bithliah a, chu chu Local Council/Village Council/ YMA ten tlangau in mipui an hriattir thin a. Hei bakah hian Sorkar pawhin Chanchinbu, Radio leh Local TV channel atangte in mipui an hriattir thin an a ti.
Multiple Connection chungchang sawiin Minister hian hei hi tam tak awm angin lang mah se, a tak takah chuan chhungkaw khatin vawikhat semah cylinder pakhat bak an dawng thei lo a ni, a ti a. Mizoram-a Gas rawn Supply dan chu IOC lamin in hre vek a, mahse englai mahin Mizoram-a Gas Connection in neih zat hi vawi khat mah Gas Refill Cylinder in la rawn supply ngailo a ni, a ti bawk. Chuvangin Mizoram-a Multiple Connection tam tak awm anga lang hi chu awmze awm lo ang tho a nih thu Minister hian a sawi.
IOC atanga Instruction thar vawi engemaw zah a awm avangin tunah hian KYC (Know Your Customer) form fill up pawh kan distributor ten an la zo thei lo a. Mizoram-ah Power Supply that loh vang te, Internet Connectivity duhthusam loh avangte in distributor te tan chak taka hnathawh harsa a ti a. KYC form fill up hi la tih zawh loh anih avangin distributor ten Multiple Connection chungchang hi an la khawih hman lo a. KYC hi tihzawh anih hunah Multiple Connection chungchang hi hmalak anih tur thu leh hei hi Local Distributor-te kutah dah anih tur thu Minister hian IOC lam hi a hrilh a. Gas Connection transfer duh ten harsatna an tawh avangin connection suspend/block zawng zawngte hi tinung (revoke) leh vek turin a ngen bawk a ni.
IOC General Manager chuan tuna an hmalakna hi Petroleum Ministry thupek anga ti an nih thu leh Multiple Connection nilo customer suspend/block a awm anih chuan KYC an thehluh hunah sut (revoke) thuai a ni ang tih Minister a hrilh a. Mipuite harsatna sukiang tura theih tawp chhuah zel a tum thu an hrilh bawk.
