Home Minister Pu R.Lalzirliana chuan vawiin khan Regency Hotel Conference Hallah Chief Minister Pu Lal Thanhawla chanchin ziahna biography ‘Lal Thanhawla’ tih, David M Thangliana ziah chu a tlangzarh.

Home Minister chuan Pu Lal Thanhawla chanchin sawi dawn chuan Mizoram chanchin leh, Mizoram a kaihhruai dan sawi angai thin a ni a ti a. Hmachhawp tam tak ala neihte hi an puitlin huna ziahlan telve anih theih nan hun remchang dangah tlangzarh zawk ni se tih a duhthu a sawi a. Pu Hawla hi politician dang ten an tluk lohna lian tak chu a ze nghehna hi a ni tiin, chu chu mipuite hriat tur tul a tih chu mi tlemte hmaa pawh a sawi teuh thin hi a ni a ti. Mizo nih leh Indian nih kawp thiam, mi ropui tak chanchin lehkhabu a tlangzarh thei chu lawmthu a sawi a ni.

Lehkhabu ziaktu Davi M Thanglian chuan Pu Lal Thanhawla chanchin hi ziak tura kum 2010 atanga a inbuatsaih tan thu a sawi a. Pu Hawla nena khunkhan taka inkawmna hun vawi thum chiah an neih thu te, Mizoram leh politics lam chanchin te leh tuldang tam tak hriat ngaite a hriat theihna tura lehkhabu rawn, bibliography 20 vel a neih thu te a sawilang a. Hemi bakah mi hrang hrang engemawzah leh Pu Hawla unaute, a nupui Pi Rii te a kawm thu a sawi bawk a. A lehkhabu buatsaih hi research ti duhte tan lehkhabu rawn tlak tling khawp ni tura a buatsaih thu te a sawi a. Tihsual palh aneihte pawh sawilangin, an inneih thla January anga a ziah chu February thla zawk, ni 24, 1969 anih thute a sawifiah bawk a ni.

Lehkhabu thlirletna neitu Pu R.K.Lianzuala chuan David M Thangliana hian Pu Hawla chanchin chu a thlahtu bul atanga ziak nimahse, chhiar ninawmlo leh fiahfai taka a ziak chu ziak thiam, chhiar nuam a ni a ti.

Lehkhabu hming chawitu Pu Lal Thanhawla chuan tun hmaa a chanchin ziak duh leh ziah tum an awm tawh thin thu sawilangin, Pu James Dokhuma te, Delhi lam mite leh Pu Chawngkunga leh Pu C.Zothansanga te hmalakna te chu a phurpui loh avanga puitling ta lo an nih thu a sawi a. Pu Davida hi chu a tumruhna avang leh luhlul chhuah a a nawr sek vanga lo puitlin ta a ni a ti a. Hetia a chanchin lehkhabu meuha siama alo puitling ta chu, Pu Davida hriat duh zawng zawngte kha lo hrilh vek ta ila tiin, tlangzarh ani ta hian ngaihtuah let tur tam tak a awm a ni a ti a. Ziak leh tur nise ka hrilh teuh tawh ang Pu Hawla chuan a ti a ni.

‘Lal Thanhawla’ hi phek 190 a chhah niin, thlalak 40 vel dah tel a ni a. Bu khat hi Rs.100/- zela lei theih a ni.