3872/2023-2024

Kawnpui, 17th February, 2024 : Vawiin khan MIZOFED Filling Station, Kawnpui Bangla Veng ami chu Supply Minister Pu B. Lalchhanzova'n a hawng.

MIZOFED Filling Station thar hawn puala inkhawm buatsaih ah Pu B. Lalchhanzova chuan a huhova sumdawnna chu mi changkangte kalkawng a nih thu sawiin, 'Cooperative Society leh a peng hrang hrangte hi a huhova sumdawnna a ni a, kan ram kan hnam hmasawnna tur a rahbi pawimawh tak a ni,' a ti a. Hma lam pan ngam tura mipuite fuihin kan ngaituahna pawh a sang ngam tur a ni a, ram tan asset kan ni a, kan ram tan thil tha titu nih kan tum tur a ni, a ti.

Minister chuan kan lungawina hi a hniam lutuk chuan hma kan sawn thei dawn lo tiin lungawina san a tul thu a sawi bawk.

B. Lalchhanzova chuan remchanna zawn zel tur tih sawiin, midang min pek leh min chhawpchhuahsak hun kan nghak tur a ni lova, a zawn a kan zawn a tul a ni, a ti a. Kan vaiin customer care kan ni a, a tawp thak thlengin customer care hi a pawimawh hle a ni tih kan hre tur a ni,' a ti bawk.

Mizofed POL RO hmun hi Pu VL Rawna (L) Chhinga Veng, Aizawl faten an pek a ni. January 31, 2022 khan laih tan niin vawiina hawn theih turin peihfel a lo ni ta a ni.

He hun hi Pu K.Rothangpuia, Chairman MIZOFED in a kaihruaia a, Pu C. Lalchhawnthanga, BoD MIZOFED in hunserh hmangin Pu K.Laldawngliana, MLA Tuirial Constituency leh Pu H. Lalfakzuala, Chairman Jt. VC Kawnpui Town te pawhin thu an sawi a ni.