Vawiin khan zan khat riak turin Food Civil Supplies & Consumer Affairs Minister Pu John Rotluangliana chuan Mizoram-in LPG lama harsatna a tawh mek sutkian dan kawng dapin Silchar-a tlawh a; Minister hian IOC hnuaia LPG bik enkawltu Senior Area Manager (SAM) JK Brahma chu khunkhan taka a titipui bakah, Borkhola LPG Bottling Plant chu a tlawh bawk.

Pu John Rotluangliana chuan SAM JK Brahma hnenah hian Mizoram-in hun engemaw chen atanga LPG a hmuh that loh dan te, mipuiin harsatna an tawh nasat dan te a hrilhfiah a. Union Minister for Petroleum & Gas Pu Darmendra Pradhan hnena Mizoram harsatna tawh mek chungchang ziaka a thlenna lehkha copy leh Union Minister-in Mizoram mamawh phuhruk tura theih tawp chhuah nghal tura IOC hotute a hriattir tur thu lehkhaa a rawn chhanna copy-te pawh SAM hnenah hian a pe a ni. Supply Minister hian Borkhola LPG Bottling Plant chu a tlawh nghal a, IOC hotute nen a hmunhma chipchiar takin an fang a, Mizoram tana LPG tam zawk thawn turin a ngen bawk a ni.

SAM JK Brahma chuan Pu John Rotluangliana hnenah thil awmzia hrilhfiahin, “Hun engemaw chen Mizoram-in LPG a dawn that loh avanga harsatna awm hi kan hria a,Union Minister hnena i lehkhathawn bawhzuiin Petroleum & Gas Ministry atang pawhin Mizoram harsatna chingfel tura tan la turin hriattir kan ni tawh a. July thla atang khan a hma aiin in hmu tha tan a, a aia tam rawn thawn lut turin theih tawp kan chhuah mek a, in harsatna hi a ziaawm tial tial ngei ang” a ti.

Borkhola LPG Bottling Plant-a IOC hotute chuan Mizoram tan bik July thla chhunga truck trip 142 an thawnluh tawh thu an sawi a, Mizoram chu theih ang anga duhsak an tum tur thu Supply Minister hi an lo hrilh a ni. Borkhola hmuna IOC hotute chuan Mizoram-a LPG Agent/Distributor ten Mualkhang Gas Bottling Plant atang chauhva lei lova Borkhola atanga LPG lei tura Bank-a sum deposit an uar a ngaih thu sawiin, “Tunlaiah SMS hmang vekin hriattir kan ni tawh a.Borkhola atanga LPG leina tur Bank-a sum an deposit rualin kan lo hre nghal thin a, pawisa an dah luh that miau loh chuan induhsak ngawt theih a ni lo ve bawk a ni” an ti.

Borkhola LPG Bottling Plant hian tun dinhmunah gas bur ruaka thun tur Gas hi metric tone 500 an dahkhawl thei a, ni khatah truck trip 44 an thun khat hman a ni. He Bottling Plant tihchangtlunna tur hian November-a hawn hman turin Metric Tonne 130 dawng thei tur Bullet 3 an bun mek a ni. Hei hi hman theih a nih hunah chuan Mizoram LPG quota pawh hi zaa 15-20 laia pung tura beisei a ni. Borkhola Bottling Plant hian Assam (barak Valley), North Tripura leh Mizoram a chawm bakah, Manipur-a Gas Distributor 1 a chawm mek a ni.

Supply Minister hi Parliamentary Secretary Pu T.T. Zothansanga leh Pu K. Lianzuala, KVI Chairman bakah DIPRO Kolasib Pu Robert Thangmawia leh Aizawl atangin media mi thenkhatten an tawiawm a ni.