Vawiin chawhnu khan Lawngtlai District Bawrhsap Pu J. Hmingthanmawia, District NLUP Co-Ordination Committee Chairman ni bawk chuan Lawngtlai khawpui chhunga AH & Vety leh Industries Department hnuaia NLUP dawngtute tlawhkualin an hma lak dan a hmunah a en.

District NLUP Co-Ordination Committee in a lo rel tawh angin vawiin hian a thawh hnihna atan District Bawrhsap chuan Lawngtlai khawpui chhunga NLUP dawngtu chhungkaw 17 te hnathawh dan a hmunah kalin a enfiah a. Heng chhungkua a tlawh te hi AH & Vety hnuai atanga NLUP dawng chhungkaw 8, Ar vulhtu chhungkaw 4, Vawk vulhtu chhungkaw3 leh Bawng vulh chhungkaw 1 bakah Industries Department hnuai atanga NLUP dawng chhungkua 9, Petty Trade thlang chhungkaw 4, Carpentry chhungkaw 2, lumeh chhungkaw 1 leh Steel Fabrication chhungkaw 1 te an ni.

Bawrhsap chuan NLUP dawngtute chu tha taka hna an thawh hlawm avangin lawmawm a tih thu a sawi a, chutih rualin hmasawnna tur tam tak a la awm a a hriat thu pawh tarlangin a dawngtute chu tan la sauh sauh turin a fuih a, Ar vulh thlangtu Pi Nikili a mah maia khawsa tuna Ar 150 vulh mek hnenah ar chaw leina Rs.1,000 a pe a, Lawngtlai District DVO, Dr. Lalnunkima pawhin Pi Nikili hi Rs. 2,000 in a tanpui nghal bawk. Pi Nikili hian Bawrhsap hnenah hian Ar chaw a nghei thu leh a leina tur a neih remchan mai loh thu a lo sawi a, Bawrhsap leh DVO hian an mahni sum atangin he tanpuina hi an pe ta a ni.

Vawiin a Bawrhsap in a tlawh NLUP dawngtute hian an thawk tha tlang hle a, Carpentry thlangtute hian a tlangpuiin thla 1 ah Rs. 30,000 - Rs. 50,000 an thawkchhuak thei niin an insawi a, vawk vulhtute hian vawi 5 aia tlem an vulh ngai loh thu an lo hrilh bakah Petty Trade (Dawr te) thlangtute hian chhungkaw chawm nan bera an hman theih thu an lo hrilh bawk. Bawrhsap hian vawiina a tlawh hmanloh midangte pawh la tlawhkual zel an nih tur thu leh Lawngtlai khaw pawn lama mite pawh a tlawh tur thu a sawi a, dik lo taka hna thawk an awm leh awm loh te pawh zawnchhuah an ni ang a ti bawk.

Bawrhsap hi Lawngtlai District NLUP Media Officer Pu K. Saitluanga, MIS, Sub-Divisional Industries Officer Pu Rinawma leh Dr. Lalnunkima District Vety Officer ten an tawiawm a ni.