No.2336/2021-2022

Mimkut thla ni 24, 2021: Vawiin khan Lawngtlaia Food Civil Supplies & Consumer Affairs (FCS&CA) Department building thar pahnih, Principal Distribution Centre (PDC) Godown leh Legal Metrology Working Standard Laboratory te chu FCS&CA Minister Pu K. Lalrinliana'n a hawng.

Hemi puala Lawngtlai DC Conference Hall-a hun buatsaihah Khuallian, Supply Minister Pu K. Lalrinliana chuan Supply Department chuan mipuiin ei leh bar leh ni tin khawsakna atana mamawh hnianghnar taka an hmuh theih nan theih tawp chhuahin hma a la reng tih sawiin, inkal pawhna kawngin duhthu a sam lohna hmunahte fur laia buhfai leh ration mamawh tur chhek khawl vek a nih thu a sawi a. FCS&CA Department hnuaiah Central Sector Scheme (CSS), 2017-20 atangin Mizoram hmun hrang hrang hmun sawm (10)-ah Rs nuai 1,922 sengin intermediate storage godown sak a nih thu leh Lawngtlai PDC Godown pawh he'ng zinga mi hi a nih thu sawiin, buhfai mamawh chhek khawlna kawnga harsatna awm thei tam tak chu hei hian a sut kian beisei a ni, a ti.

Minister chuan FCS&CA Department hnuaia peng (wing) pakhat, Legal Metrology chu mipuiin ei leh bar leh ni tin khawsakna atana an mamawh leh hmanraw hrang hrangte tha tak leh buk tling ngei an hmuh theih nan a pawimawhzia sawiin, sawrkar pawhin ngai pawimawhin a thuam chak chho zel tih a sawi a. Lawngtlai District-a la awm ngai lo Legal Metrology Working Standard Laboratory din a ni ta leh thawktu dah an ni ta chu District mipuite'n an dikna chanvo an hmuh theih nan hmasawnna lawmawm tak a nih thu a sawi a. Consumer-te dikna humhalh a nih zel theih nan Consumer Forum thuam chak kawngah pawh sawrkarin hma a la mek tih a sawi bawk.

Minister chuan ram a than rualin mamawh pawh a pung ve zel tih sawiin, ei leh bar leh khawsakna atana mamawh kawng hrang hrangah intodelh tura tan lak a tul thu a sawi a. Tun hnaiah hri leng leh ramri buaina karah ramin harsatna a tawk a, ei leh bar leh mamawh bulpui erawh buai lova kan awm thei hi Pathian venna leh enkawlna a ni tiin, he'ng harsatnate hi inhmangaihna leh induhsakna leh intodelh duhna thinlung min petu a nih avangin vanduaina kara malsawmnaah kan chhiar thiam a pawimawh a ni, a ti.

He huna khual zahawm, Lawngtlai East Bialtu MLA, Agriculture Development Board Vice Chairman Pu H. Biakzaua chuan Lawngtlai District tana hmasawnna ruhrel pawimawh tak pahnih hawn theih a ni ta chu lawmawm a tih thu sawiin, sawrkar chungah lawm thu a sawi a. Lawngtlai District chu ram dang nena insumdawn tawnnaah kawtchhuah pawimawh a nih dawn avangin infrastructure-ah thuam that a ngai tih sawiin, sawrkar hna thawkte pawh District tana a awm sa bak, hma sawnna thar atan ngaihtuahna thar seng turin a chah a ni.

Khual zahawm dang, Lunglei South bialtu MLA, Bamboo Development Board Vice Chairman Dr K. Pachhunga chuan hmasawnna ruhrel thar an neih chungchangah Lawngtlai District a lawmpui thu a sawi a. Mipuite chu sawrkarin theih tawpin ram mipuite tan hna a thawk tih hria a, sawrkar thawhpuia thlawp zel tutin a chah bawk.

Vawiina PDC Godown leh Working Standard Laboratory hawnna hun hi FCS&CA Secretary Pu Zothanmawia'n a kaihruai a. BCM Lawngtlai North Pastor Bial bialtu pastor Rev. H. Lalremtluanga'n hunserh a hmang a. PDC Godown satu Babie Construction & Consultancy Services (BCCS) ai awh leh Legal Metrology Department ai awh atangin technical report ngaihthlak a ni a. Lawngtlai Bawrhsap Dr Andrew H. Vanlaldika'n thu tawi sawiin, FCS&CA Director Pi Ramdinliani'n lawm thu a sawi bawk.

He hunah hian Minister nupui Pi C. Lalmalsawmi, Lai Autonomous District Council (LADC)-a Chief Executive Member Pu V. Zirsanga leh Executive Member leh MDC-te, sawrkar official-te, VC Association, tlawmngai pawl leh political party hruaitute leh chanchinbu mite an tel a ni.

Lawngtlai PDC Godown hi a dung 150 ft leh a vang 35 ft-a zau niin, buhfai metric tonne 1,000 dah theihna tur a ni a. A sak hna hi Babie Construction & Consultancy Services (BCCS) te'n thawkin, ni 19.10.2019 leh ni 25.9.2020 inkar chhungin an sa a. Rs 2,00,44,000/- senga sak a ni.

Legal Metrology Working Standard Laboratory hi 'Strengthening of Legal Metrology Infrastructure of States & UTs' scheme kal tlanga sum hmuh, Grant in Aid Rs nuai 50 hmanga sak a ni a. A sak hna hi Mizoram Technocrats Company (P) Ltd te'n thawkin, ni 01.06.2016 - 28.02.2017 inkar chhungin sak a ni a. A zau zawng hi square metre 120 niin, room pahnih leh bathroom pathum a awm a ni.