1351/2023-2025 

2nd August 2023 : Food, Civil Supplies & Consumer Affairs changtu Minister Pu K. Lalrinliana'n vawiin khan Saitual District tana District Civil Supplies Office, Saitual DC Complex sak thar mek bulah Legal Metrology Working Laboratory Building sak, DCSO hmun atana buatsaih chu ribbon chep chatin  a hawng a, a hawnna programme Government Saitual College Auditorium a neih chu a hmanpui nghal bawk.

DCSO Office thar hawnna puala inkhawm tawite Government Saitual College Auditorium a buatsaihah thu sawiin Supply Minister Pu K Lalrinliana chuan DCSO office hawn thar chu Department leh Saitual District tan hmasawnna rahbi thar anih ngei a beisei tiin mipuite ten nasa taka an chhawr tangkai ngei a rin thu a sawi bawk. Ration card tihdanglam ngai a tam thin a, hengte hi Aizawl ah emaw Champhai ah emaw tih a ngai tawh dawn lova, hengte hi Saitual ah ngei a tih theih dawn a, hei hi a lawmawm a, office thar hi hun lo kal zel turah changtlung zelin mipuite tan malsawmna a thlen ngei ka ring a ni, a ti.

Supply Minister chuan hripui lenlai a mipuiten buhfai leh eirawngbawlna gas an mamawh ang an hmuh theih nana Sawrkar hmalakna leh ruahmanna te sawiin Department a enkawl tan tirh a, Mizoramin gas chungchanga harsatna a neihte chu Ministry ah a zuk thlen nghal thu te sawiin Central Minister in gas lama Mizoram harsatna te sutkian nan kan mamawh ang min pek a tiam a, chumi ang chuan eirawngbawlna gas hi kan mamawh ang kan dawng ta a ni, a ti a. Ministry dawr hnua Mizoramin gas a dawn nitin trip 17 chu trip 23 ah tihpun anih thu tarlang a ni.

Pu K Lalrinliana chuan nikum lama Assam nena ramri buai laia Sawrkarin buhfai, oil leh gas te, state dang leh thenawm ram te atanga chawkluh nana ruahmanna leh hmalakna a hun laia siam thenkhatte te tarlangin Manipur leh Tripura lama kan unau ten kan nghei hma chu in nghei lovang tiin an sawi a, an tawngkam kha a thlamuanthlak a, kan theihngilh dawn lo a ni, a ti.

Sawrkarna chan tirhin  Department in kudam 31 sakna hmun, sak zawh takte atanga sum bang hmangin Kolasib DCSO Office leh Mamit DCSO Office sak a nih thu tarlangin buhfai, eirawngbawlna gas leh tuialhthei hnianghnar taka mipuite pekna kawngah theihtawp a chhuah thu te a sawi a ni. 

Programme hi Aizawl Mayor Pu Lalrinenga Sailo leh Saitual DC Dr. Lalngura Tlau ten an hmanpui bakah Saitual a Office hrang hrang hotute te pawhin office thar hawnna hi an hmanpui a ni.

Programme hi Secretary, Food, Civil Supplies & Consumer Affairs Pi Teresy Vanlalhruaii'n kaihruaiin, Dr. Andrew H. Vanlaldika, Director, Food, Civil Supplies & Consumer Affairs in inlawmna thu sawiin hun a hawng a.  Pu Victor Lalawmpuia, Deputy Director, Food, Civil Supplies & Consumer Affairs hnen atangin report ngaihthlak niin Joint Director, Food Civil Supplies & Consumer Affairs Pu Lalmuansanga Ralte in lawmthu sawiin hun a khar a ni.

District Civil Supplies Office tharah hian District Civil Supplies Officer, Inspector, Sub-Inspector leh Group D pahnih post an ni a. DCSO thar hian Saitual District hnuaia Supply Kudam 10 a enkawl dawn a. Tun hmain heng kudam te hi  DCSO Aizawl East leh DCSO Champhai ten an hmui thin a ni. Supply Minister in a enkawl Department dang Fisheries Department hnuaiah District Fisheries Development Office Saitual District pawh hawn a lo ni tawh a ni.