No.7288/2020-2021

Vawiin khan Food Civil Supplies & Consumer Affairs Minister Pu K. Lalrinliana’n  Zuangtui-a Supply Department Kudam a tlawh a. FCI atanga buhfai leh Open Free Market (bazar) atanga buhfai lei te a en bawk.

Pu K. Lalrinliana chuan tunhnaia retailer thenkhatin buhfai tha lo an dawng nia sawi a awm avangin FCI atanga buhfai dawn leh Open Free Market atanga buhfai lei te a dinhmun en thlithlai tha a tih avanga Kudam hi tlawh a nih thu a sawi a. Uluk taka a en hnuah Minister chuan heng buhfaite hi a tha thawkhat tih a sawi a, buhfai ip sang tam tak zingah a chhia bag hnih khat a awm palh thei a, hengte hi retailer thenkhatin an lo dawng palh a ni thei a, mahse chutiang an lo dawng palh a nih chuan buhfai tha lo hi chu Retailer ten kudam ah a tha in an thleng thei reng a, thleng tur pawhin  hrilhhriat an ni, a ti.

Minister hian Zuangtui Kudam a FCI-in an hman ang Leotronics company siam Weigh Bridge dahna hmun tur pawh a en nghal a. Thawkkhat lai khan FCI atanga buhfai lak Zuangtui kudama buk lehin a in mil thei lo tih hmuhchhuah a ni a, ama ho ngei pawhin nikum khan hei hi an finfiah tawh a ni, tiin Weigh Bridge hman thin chu hman tlak loh a nih avangin Weigh Bridge thar dah turin hma lak mek a ni, a ti a. Weigh Bridge thar Leotronics company siam chu order ni tawhin bun vat beisei a nih thu a sawi. Zuangtui Kudam hlui tawh sak thatna tur NABARD funding dil mek a nih thu leh Kudam ramri chin hung (fencing) turin hma lakna a kal mek thu a sawi bawk. Sawrkar tharah Mizoram khaw hrang hrangah Kudam 10 sak zawh tawh a nih thu leh a dang 21 te sak mek a nih thu pawh Minister hian a tarlang bawk a ni.

Minister hi Pu Vanlalngaihsaka, Secretary, Food Civil Supplies & Consumer Affairs; Dr. Lalhriatzuali Ralte, Director, Food Civil Supplies & Consumer Affairs leh Supply Department hnathawktu dang ten an tawiawm a ni.

Dr. Lalhriatzuali Ralte, Director, Food Civil Supplies & Consumer Affairs chuan buhfai quality endik hna hi Monitoring Committee in a uluk takin enin an vil reng thu a sawi a, a khat tawkin sample te la in Food Testing Laboratory ah te pawh kan test tir thin, a ni, a ti.

Kudam a tlawh hnu hian Pu K. Lalrinliana, LAD changtu Minister ni bawk chuan MPSC Office thlanga LAD Office sak mek a tlawh bawk a, hnathawh leh hma lak dan a en nghal a ni.