No.6459/2020-2021

Kolasib 6th November 2020:   Vawiin khan Pu K Lalrinliana, Minister of State, Food, Civil Supplies & Consumer Affairs Department chuan motor lawn kai thei tur a thawmthat mek Bairabi rel chawlhhmun tlawhin Bairabi leh Kanhmun inkar kawng thawmthat hna kalpui mek a endik bawk.

Bairabi rel chawlhhmun a tlawhnaah hian Minister chuan ramri a buaina avanga mipui mamawh chawkluh kawnga harsatna awm thei chin felna turin ruahmanna hrang hrang siam a nih hnuah Bairabi rel chawlhhmun chu rel hmanga lirthei phurh luh a nih theih nan thawmthat a nih thu sawiin he hmalakna hian nakin zel a nitin mamawh chawkluhna kawngah hmanraw tangkai tak a nih ngei a beisei thu a sawi bawk. RORO Rel atanga motor lawn kaina leh tlan thlakna tur dawhsan hi FCS & CA Department hmalaknaa ngawrh tak a siam niin naktuk hian enchhin tur a peihfel hman beisei a nih thu thawktute chuan an sawi a ni.

Kanhmun leh Damcherra inkalpawhna lei thawmthat mek chu a hmunah tlawhin Supply Minister chuan lei hi peihfel a nih chuan ei leh bar piah lamah heti lai hmun hi insumdawn tawnna hmun pawimawh tak a la nih tur thu a sawi a. Sawrkar ruahmanna hnuai a thawktute theitawp chhuah a an hmalakna chungah lawmthu a sawi nghal bawk a ni.

Kanhmunah hian Minister hi Er. Bowman, Chief Engineer (Highways) leh PWD a hotuten an lo dawngsawng a, Langkaih lei thawmthat mek chu tluang tak a kalpui a nih chuan kar 2 hnuah peihfel a beiseiawm thu an sawi a ni.

Minister hi Er. HP Zothankhuma, Sr. EE, PWD Kolasib Division, Pu HC Lallianzuala, DCSO, Kolasib leh Pu Hmingthanzuala, DIPRO-te bakah Mamit district official ten an tawiawm.

PWD Kolasib division, Kawrthah Division, NH Division 1, NH Division 5 leh Mamit Division bakah lei dawh buaipui tur in Mechanical Division, Aizawl ten Bairabi leh Zamuang inkar kawng thawmthat hna hi an thawk a. Bairabi leh Zamuang inkar hi km 27 vel niin a chhe zualpui thawmthat ngai hi km 7 ang vel a chhut a ni. Teirei lui leh Langkaih lui kan tu lei thawmthat hna ngawrh tak a kalpui mek a ni bawk.

Supply Minister hian Bairabi rel chawlhhmun a hnathawkte ei leh in man cheng 5000, Zamuang leh Bairabi inkar PWD hnathawk te hnenah cheng 5000, Langkaih lei dawh that hna thawktute cheng 10,000 bakah Kanhmun Police ramria duty-te tan a tul a hman tur cheng 15,000 a pe a, Teireia lei thawmthat hna kalpui mek puih nan hian JCB a chah belh sak bawk a ni.