Inthlanna felfai neihna tura thil pawimawh ber ber pahnih - Electoral Roll dik leh Vote nei zawng zawngin kim taka vote an thlak pawimawhzia chungchanga Election Commission of India in rampum huapa beihpui (Systematic Voters Education and Electoral Participation Campaign) vawiin September 14 a thlak tura a tih angin Mizoramah pawh vawiin khan I & PR Auditorium a inkhawm pawimawh tak buatsaihah Mizoram Chief Secretary Pi L. Tochhong chuan campaign hi a hawng a, district dang zawngah pawh district thuneituten tan ve nghal tur a tih an ni.
He beihpui thlak hawnna thuchah sawiin Pi L. Tochhong chuan Mizorama inthlanna fel leh fai, ralmuang leh zalen taka buatsaih anih thin ah hian tlawmngai pawl hrang hrangte hnathawh chu khawvel huap pawha thil chhuanawm ber a nih a rin thu a sawi a. Election Commission of India duhthusam anga ram khua leh tui dik tak leh kumtling chin Electoral Roll a thun chungchang leh vote nei tam thei ang berin vote an thlak theihna tura mipui mimir hrilhhriat kawngah tlawmngai pawl, political party, thuthar thehdarhtu leh official te chu lungrual taka thawkho zel turin a sawm a ni. Chief Secretary chuan Mizoramah vote nei thei zawng zawngin EPIC an nei kim thei ta chu lawmawm a tih thu a sawi a, thawktu leh mawhphurtute chungah lawmthu a hrilh a ni. Sakhuana leh rinna hran neih avanga Electoral Roll a hming thunlut ve duh lo la awmte pawh an rilru hmina khua leh tui dik tak chanvo leh tih tur anih zia hrilhfiah turin thawktu zawng zawngte a chah bawk a ni.
SVEEP thil tum tlangpui sawi nawnin Chief Secretary chuan mipui rorelna sorkar-ah inthlanna dik leh felfai chu thil pawimawh hmasa ber anih avangin vote nei thei chin dik takte chu Electoral Roll ah a kim thei ang bera thun leh chungte chuan an mawhphurhna hlena vote an thlak vek chu Election Commission of India duhthusam a ni a ti.
He campaign hawnna inkhawm Jt. CEO Pu H. Lalengmawia kaihhruaiah hian CEO Pu K. Riachho IAS chuan thuhma a sawi a, Election Commission of India hnuaiah SVEEP Division din anih dan leh an hmalakna hrang hrang a tarlang a. Inthlan kaihhnawiha dan dinglai Peoples Representation Act, 1951 leh Conduct of Election Rules, 1961 hnuaia dan leh hrai tesep hrang hrang te chu he division hian chak takin a kengkawh a. Inthlan dawn hnaiha model of code of conduct te pawh chak taka kengkawhin inthlanna fel leh fai neih chu a tum ber a ni, a ti. Pu K Riachho chuan October ni 1, 2012 atangin Electoral Roll endik hna, Special Summary Revision thawh leh tum a nih thu leh 1.1.2013 a kum 18 tling chin thunvek hna chu January ni 5 ah tarchhuah tum a nih thu te sawiin tun tum Revision hi nakum maia MLA inthlan anih dawn avangin a pawimawh bikzia hre turin Political Party, tlawmngaipawl leh mawhphurtu dang zawng zawng chu a chah a ni.
Thusawitu dang Dr Lalbiakmawia Ngente, MPF Secretary chuan Electoral Roll leh inthlan huaihawt chungchanga MPF hmalakna tlangpui leh thawhhona tha tak an neih mek chu chhawm nung reng turin kalkhawmte a sawm bawk.
Vawiin campaign hawnna ni ah hian Aizawl District huamchhunga ERO, AERO, BLO bakah YMA, MPF, Political Party leh media hrang hrang te an kal tha hle a ni.
