No.2882/2021-2022

Aizawl 5th November 2021: Systematic Voters' Education and Electoral Participation program (SVEEP) hmalakna kal zelah vawiin khan Aizawl DC Conference Hall ah essay inziahsiak, slogan inphuahsiak leh awareness video clip insiamsiak lawmman sem a ni a. Election Officer Pi V.Lalmuanpuii’n he hun hi a kaihruai a ni.

Kum 2022, January ni 1 a kum 18 tling hman tur te tan November ni 1 atanga ni 30 chhung hian mahni bialtu BLO te hnenah Electoral Roll-a hming ziaklut tura dilna thehluh theih a ni a. India Sawrkar chuan kum 18 chin chunglam, India khua leh tui zawng zawngin mipui aiawh thlan theihna vote an neih vekna turin nasa takin hma a la a. SVEEP hi mipuiin vote thlak awmzia leh hlutna te, electoral roll-a hming chuan pawimawhzia leh kum tling tawh phawt chuan a hun taka hming ziahluh leh vote thlak hi kan mawhphurhna a nihzia inzirtirna program a ni.

Pi V.Lalmuanpuii chuan mipui sawrkara ram rawngbawlna hna mipuiin kan thawhtheihna kailawn hmasa ber chu electoral roll a hmingziah luh leh vote thlak hi a ni, a ti a. Ram leh hnam siamna hmanraw pawimawh ber chu ramhruaitute thlang chhuak tura vote thlak a nih avangin mitinin vote thlak kan ngai pawimawh tur a ni, a ti. Aizawl DC buatsaih intihsiaka tel zawng zawngte chu SVEEP ambassador an ni tiin vote thlak pawimawhna leh electoral roll a hming ziahluh pawimawhzia midangte hrilhhretu ni turin a sawm bawk a ni.

Essay inziahsiakah hian Brendon Lalramnghaka Khiangte, Pachhunga University College zirlai chuan lawmman pakhatna a dawng a, Tholehlalrindiki, Govt. Aizawl College zirlai chuan lawmman pahnihna dawngin; Vandingpuii, Pachhunga University College zirlai chuan lawmman pathumna a dawng a. Slogan inphuahsiakah hian lawmman pakhatna dawngtu chu Lalnunsanga, Dungtlang a ni a; lawmman pahnihna chu Dr Lalhmangaihsanga, Mission Veng chuan lain, lawmman pathumna hi K. Lianthangsanga, Council Veng, Siaha chuan a dawng a. Video clip tawi insiamsiakah Lalthianghlima Ralte, Durtlang chuan lawmman pakhatna a dawng a, lawmman pahnihna dawngtu chu C.Lalramngaiha, Armed Veng South niin B.Lalremtluanga, Zotlang, Lunglei chuan lawmman pathumna a dawng thung a ni.

Vawiina lawmman dawngtute thuziak leh kutchhuak hi Aizawl DC office chuan an social media platform leh SVEEP programme an kalpuina hmunah te mipui hmuh theih turin an tarlang dawn a ni.