2557/2023-2024

Dated Serchhip, the 31st October, 2023: Nizan khan Serchhip District Election Office buatsaihin New Serchhip VC House-ah kum upa (senior citizens) te zingah vote thlak pawimawhzia inzirtirna hun hman a ni a. He hunah hian Tuikum Assembly Constituency ARO Pu Stephen Auhmun chu Resource Person a ni a, SVEEP Nodal Officer Pi Lalnunmawii, DIPRO Serchhip chuan programme kaihruaiin, Govt.Serchhip College Asst. Professor Dr.Zarzosanga, Electoral Literacy Club enkawltu pawh he hunah hian a tel a ni.

Programme-ah hian Mizoram Upa Pawl, New Serchhip North Branch member 40 chuang an tel a. Resource Person chuan vote thlak pawimawhna tih thupui hmanga thusawiin kum upa te chu anmahni mai bakah an tu leh fate thinglungah vote thlak pawimawhzia tuhnghet a, chhungkua ah vote thlak hlutna zirtirtu ni turin a chah. Kum upa te tana sawrkarin a bik taka ruahmanna a siam te sawi langin kum 80 chunglam, Polling Station thleng thei tawhlo te tan an inah kal chilha vote thlak tir an nih thu te; chu mai bakah sawrkar ruahmanna in vote thlak ni November ni 7 ah tar chak lo te chu an kalna tur motor ruahman a nih tur thu te a sawi a ni.

Zawhna leh chhanna hun hman zui nghal a ni a. Mizoram Upa Pawl, New Serchhip North Branch President Pu Rualzakhuma’n lawmthu sawiin hun hnung a khar a. Vote thlak pawimawhzia inzirtirna video clip tawi buatsaih a ni bawk.