2889/2023-2024

Aizawl, 30.11.2023: Kumin Mizoram Legislative Assembly atana General Election neih ah vote a tlak that nan leh voter te'n duhthlanna dik an siam theih nan SVEEP (Systematic Voters’ Education and Electoral Participation) Aizawl District chuan newspaper tan inelna - Editorial Competiton - 'Bouquet of Words' a buatsaih a. Chunga titha thlanchhuah pathum hnenah vawiin khan Aizawl DC Pi Nazuk Kumar, District Election Officer ni bawk chuan a pisa ah anmahni kawmna neiin, lawmpuina thuziak leh pawisafai a hlan a ni.

He Newspaper Editorial competition ah hian October ni 16 atanga November ni 7, 2023 chhunga newspaper ah SVEEP thupui 'Greater Participation for Stronger Democracy' leh a thil tum zulzuia editorial chhuah tam ber pathum te chu lawmman dawng tura thlan an ni a. Lawmman dawngtute hi Virthli, Vanglaini leh The Aizawl Post te an ni a. An zavai hian lawmpuina thuziak citation leh pawisafai cheng 5000 theuh pek a ni a. Editor leh an aiawhten lawmman hi an dawng a ni.

Lawmman pekna hunah hian Aizawl DC chuan Mizo mipuite chu dan zahna leh ngaihpawimawh nachang hre ber te zing ami nia a hriat thu sawiin, press mite pawhin hemi atan hian hna pawimawh tak an thawk tih a hriatpui thu a sawi a. Tun inthlanpui ah hian thuthar lakhawmtute hna thawh danah lawmthu sawiin, sawrkar an tawiawm dan leh inthlan felfai tak nei thei tura an hma zawna theih tawp an lo chhuah danah lawmthu a sawi a ni.

Chanchinbu aiawhte chuan inthlan muanawm leh felfai neia vote thlak tura mipui sawmna thu an lo ziah chu an mawhphurhna ve reng a nih thu leh, lawmman beisei a ziak an nih loh thu an sawi a. Chutichunga Aizawl DEO leh SVEEP Committee in ruahmanna an siam kaltlanga lawmpui a an dawng chu lawmawm an tih thu an sawi a ni.

He hunah hian SVEEP Committee aiawh in Asst. Nodal Officer leh member te an tel bawk a ni.