2888/2023-2024

Aizawl, 30.11.2023: Vawiin chawhma khan Aizawl DC Conference Hall ah PI Nazuk Kumar, Aizawl DC leh DEO ni bawk chuan kumin Mizoram MLA inthlanpui vote chhiar chungchangah political party aiawhte a kawm a. Ruahmanna siam leh thu pawimawh inhrilhhriat ngaite sawiho a ni.

ECI ruahmanna ding mekah chuan vote hi December ni 3, 2023 ah zing dar 8:00 AM atanga chhiar tan tur a ni a. Counting agent-te chu zing dar 7:00 ah a hmun thleng vek tura beisei an ni. Strong room hawn leh vote chhiar zawh a khar a nih lai hian party aiawhte an tel tur a ni bawk.

Aizawl district ah chuan counting centre pathum - DC Office, Assembly Annexe Secct. Basement leh Govt. Aizawl College Sikulpuikawn te a ni a. Vote chhiarna counting hall chhungah mobile phone kenluh phal a ni lo a. Venhimna pawh thuh thum in CAPF, IR Battalion leh Mizoram Police te an duty dawn a.. medical duty leh tul dang pawh ruahmanna siam a ni.

DC Office ah hian Aizawl North-II, Aizawl North-III, Aizawl East-I, Aizawl East-II, Aizawl West-I leh Aizawl West-II assembly constituency a vote tla chhiar  a ni ang a. Assembly Annexe Sectt. Basement ah hian Tuivawl, Aizawl North-I, Aizawl South-II leh Aizawl South-III constituency a vote tla te chhiar niin, GAC ah hian Aizawl West-III leh Aizawl South-I Assembly Constituency a vote tla chhiar a ni ang.