3899/2022-2023

Aizawl the 20th March 2023: Vawiin khan Social Welfare & Tribal Affairs ( SW & TA) Minister Er. Lalrinawma chuan Secretariat Conference Hall, MINECO-ah Poshan Pakhwada (chaw tha leh hrisel hmuhtheihna tur atana hmalakna), 2023 chu khuallian niin a hawng a. Hawnna inkhawm hi Pu Madhup Vyas; Secretary, SW & TA Department in a kaihruai ani.

Minister Er. Lalrinawma chuan SW & TA department-a a thawhpuite rim tak leh lungrual taka an thawhhona avangin Poshan Abhiyaan chu Mizoram-ah hlawhtling taka kalpui mek a nih thu a sawi a; Poshan Pakhwada chu sawrkar laipuiin ruahhmanna a siam angin March Ni 20 atanga April Ni 3 thleng awh tur a nih thu sawiin kumin thupui atan:-

1) Promotion and Popularization of Shree Anna/Millets for nutritional well being
2) Celebration of Swasth Balak Spradha (Healthy child)
3) Popularizing Shaksham Anganwadis-te a nih thu sawi.

Minister Er Lalrinawma chuan kum 2023 chu ‘International Year of Millets’ a nih angin Poshan Pakhwada hmanna kawngah millets (buhtun) lam hawi activity siam a nih thu a sawi a; theihtawp chhuaha tihlawhtling zel turin thawktute leh departmeng hrang hrang atanga kalkhawmte a fuih bawk a ni.

Minister chuan Poshan Pakhwada chhungah programme hrang hrang duan a nih thu sawiin - Campaign, IEC Campaign leh Awareness-te, Youth Group Meeting te, Radio/Tv Programme, State Level Painting Competition, Workshop, Swasth Balak Spradha, Cycle Rally-te neih a nih dawn thu a sawi a. Ram hmasawnna atana pawimawh tak hriselna kawngah rahbi thar kai thei turin ram mipui zawng zawng theihtawp chhuah tura sawm bawkin tuna rim taka thawh chuan ram a nghawng ang a, nakin zelah ram dinhmun a ti nghet zual zel dawn a ni, a ti bawk.

Vawiin hawnna inkhawm-ah hian Pi Sailopari, Deputy Director, Women and Child Development (WCD) in Poshan Pakhwada 2023 activity calendar presentation a pe a, Pi Lallianpuii, Director WCD in lawmthu sawiin programme hi tihtawp a ni.

Poshan Pakhwada hi nu naupai leh naupangte hriselna leh an tana chaw tha chungchang tlangauna programme a ni a. Kum 2023 Poshan Pakhwada hian March Ni 20 atangin April Ni 3 thleng a awh dawn a, activities hrang hrang buatsaih tum niin April Ni 3 chawhnu dar 1:30 ah kharna hun hman tura ruahhman a ni.