Mizoram Sorkarin kumin October ni 2 -9 chhunga Swachh Bharat Cleanliness Week 2015 hmang tura a phut bawhzuiin vawiin khan Champhai I&PR Conference Hall-ah he ni hman dan tur rel in Addl DC Pu C. Lalzarliana hovin thutkhawm a ni a. Swachh Bharat Gramin hnuaia thingtlang khua a National Sanitation (Cleanliness) Campaign kalpui dan tur rel zawm a ni bawk.
Champhai Addl DC chuan district fai leh thianghlim siam tur chuan mipui rilru ah thianghlimna ngaih pawimawhna tuh a tul a ni tiin, Thianghlimna Hapta hman turah pawh ni tlem te chauh daih nilovin kan nitin nun a faina ngaihpawimawhna hringchhuak se a tih thu a sawi a ni.
Vawiin meeting chuan Swachh Bharat Cleanliness Week chu October ni 2-ah CHANEM Building kawtah zingkarah UD&PA Office buatsaihin hawnna hun buatsaih tura a rel bakah, hemi ni hian faina hnatlang neih te rel niin, Swachh Bharat Mission (SBM) Volunteer a ruat Bharat Scouts & Guides-te zingkara hnatlang tur ten ruat an ni bawk a. Hemi hapta chhung hian Office leh Zirna in bakah Veng leh Town Area fai ber thlan a ni bawk ang. He Faina Hapta kharna hun hi October ni 9 a neih tura ruahmanna siam a ni bawk.
Meeting chhawng hnihnaah hian PHED bultumin National Sanitation (Cleanliness) Campaign kalpui dan tur rel a ni a. District chhunga khaw tinte faina leh thianghlimna inzirtir a Swachh Bharat Campaign kalpui theih dan tur te leh khawtlang hruaitute nena thawhho dan tur te sawiho a ni.
Vawiin meeting-ah hian Sorkar Office hotu thenkhat leh Tlawmngai pawl hrang hrang leh Khawtlang hruaitute bakah School hotute leh MJA hruaitute an tel a ni.
