Vawiin khan Chief Secretary Pu Lalmalsawma hovin Chief Secretary Conference Room-ah Health & Family Welfare Department hnuaia National Health Mission bultuma naupang leh tleirawl te hriselna tura programme kalpui mek RBSK (Rashtryia Bal Swasthya Karyakram) leh RKSK (Rashtryia Kishor Swasthya Karyakram) hrang hrangte thlir ho a ni a. Hemi in a kaihhnawih Department hrang hranga Secretary leh hotu dangte an tel tha hle.

RBSK leh RKSK atan hian department hrang hrangte nen thawhhona tha neih a pawimawh thu Chief Secretary chuan a sawi a. Hemi a an thawhpui tur department hrang hrang, a bik takin Education te, Social Welfare Department, Health Department, Police, NGO leh a dangte tana hriat fiah a awl zawk theihna turin hemi chungchang inkaihhruaina lehkhabu te guide book tawi fel taka siamin mawhphurhna neitu te tan a tangkai a beisei thu a sawi.

He meeting ah hian Dr. K. Ropari, Principal Director, H & FW Department chuan RBSK & RKSK programme leh a kalphung tlangpuite a sawifiah a. Dr. Lalthlengliani, State Level Officer (RBSK & RKSK) Directorate of Health Services chuan hemi kawnga hmalakna te tuna a thlen chin leh hmasawnna te power point presentation hmanga hrilhfiahin a tarlang a ni. India ramah 7th January, 2014 khan hman tan a niin Mizoram ah chuan April, 2014 ah khan bultan a ni a. Tunah hian District 4 ah din a ni tawh a ni.

Meeting chuan Sorkar school leh anganwadi centre hrang hranga naupang leh tleirawlte hriselna kawnga hmasawn zelna tura Health department, School Education department leh Social Welfare department te hlawk zawka an thawhho zel dan tur kalkhawmte hian an sawi ho.