Vawiin hian Lawngtlai DC Conference Hall ah Addl. DC Pu R. Lalsangluaia kaihhruaiin District Swachh Bharat Missions Gramin (Rural) hawnna neih dan tur leh hmalak dan tur hrang hrangte ngaihtuahin an thukhawm.

Meeting chuan kumin chhung bik atan sum hman tur awmsa ang zulzuiin hmalak dan tur a rel a, Solid and Liquid Waste management component atangin khaw thum Kawlchaw West, Lungtian leh Ngengpuikai khuate chu hmalakna atana chhawpchhuah an ni a. Heng khuaahte hian mipuite hnena hrilhhriatna mumal tak neih a nih hnuah bawhhlawh sawngbawlna/paihna tur Rs 7 lac senga buatsaih sak an ni ang.

Individual Household Latrine Component hnuaiah kumin atan bik Unit 780 sakna tur sum awm chu khaw inkalthelh (Saturation) awm lo thei tura thlan chhuah thaa hriat anih angin unit 780 sak theihna zat khaw 13, ekin mamawh belhkhawm 780 awmah kalpui nise an ti bawk. Hengte bakah hian Thingtlang khaw kilkhawr zawka hman tur Ekin thleng (Squating Plate) 665 chah mek a ni baw.

Central sawrkar lam duh danin District huap Faina Rally lian tham tak nei tura ruahmanna siam a ni a, vantlang hmuna Faina lam inzirtirna lemchan (nukad nataks) te, School inelna tur Debate Live Telecast a neih te, Faina lam hawi thuziak leh thuchei mitla tak tak vantlang hmun remchanga tar chhuah te bakah TV a faina lam hawi inzirtirna nasa taka chhuah dan turte ruahman a ni.

Chutiang bawkin Thingtlang khaw thlan bik engemaw zatah Faina Rally nei tura ruahmanna siam a ni bawk a. Khawtlang huap inzirtirna leh inchawhphurna remchang atan hman tum a ni bawk.

He meeting-ah hian Swachh Bharat Missions, Lawngtlai District Member Secretary Pu Ngentluanga, Sr. EE PHE chuan Swachh Bharat Rural Missions hnuaia Lawngtlai District chhunga hmalakna tur ruahmanna hrang hrang leh hnathawh tan tawh te chipchiar takin a sawifiah a ni.