Pu Joseph Lalhimpuia  Parliamentary  Secretary, Education chuan vawiin khan SCERT  Auditorium, Chaltlang-ah Class IX leh Class XI zirlai titha te hnenah  Proficiency Cash Award  2015 a hlan.

Zirlaite chu an thiamna leh tih thatna ah chhuanawm a tih thu sawiin Khuallian Pu Joseph Lalhimpuia chuan  tuna an tih thatna chu  tawpna a ni lo tih  hria a, kal zelna tur an la nei tih hre tur leh damte a awmin nakin kum nga kum sawm ah eng ang in nge an in zir puitlin anga, eng mi nge an nih ang  tih thlir lawk  thiam a tul thu  a sawi .Tunlai thalai ten thiamna (talent ) an nei tha tawh hle a, mahse chutih laiin  Zu leh  ruihtheih thil in a tih buaina lakah inveng fimkhur thiam a,thawhrimna leh tumruhna  nen  tangkawpa hlawhtling ngei tur in a fuih a ni.

Education lam abik takin Science leh Mathematics ah kumin hian sorkar hmalakna in hmasawnna a tam thu  leh school tam tak tan zirna atana tangkai tur mamawh leh hmanraw hrang hrangte lei a nih thu Khuallian chuan a sawi a. Tunah hian NCTE, Govt. of India ah ralkhat atanga zir theihna tur DIET Lunglei a mi tur chu ah dil mek a  niin   sum lamah harsa hle mahse sorkar chuan tunhnaiah High School Headmaster tur mi 15 a dah fel tawh in Middle School Headmaster tur mi 76 dah fel leh mek a ni a ti.

Hostel chungchang sawi nghal in Pu Joseph Lalhimpuia chuan Mizoramah hian mumal takin Hostel Rules a la awm lova, Hostel  thenkhatah phei chuan  inthununna leh invawn thatna mumal awm lovin Eng leh tui bakah ei leh in te a tha lova, chuvang chuan sorkar in ruahmanna siamin Hostel Rules a duan mek chu peih fel tep anih thu sawiin Education lam hotute thahnem ngaihna avangin Education ah hmasawnna a kal mek a ni, a ti a. Vawiina kalkhawm Class IX leh XII promotion titha mi 65 te hnenah Cash Award Rs. 3000 theuhin a hlan nghal a ni.

Proficiency Cash Award hlanna hi Pi Malsawmthangi, Director, SCERT in a kaihruai a. SCERT in a hma an lakna te leh Cash Award hlan chungchanga an hmalak dan te a sawi a. Pi D. Ramdinthangi, Jt. Director, SCERT chuan Welcome Address leh report a pe bawk a ni.

Cash Award for Proficiency in Science & Mathematics hi School naupang zingah heng subject a tuina leh inelna thianghlim a awm theih nana Education Department in kum 1978 atanga a lo duan tawh a niin kum tin he cash award hi hman thin a ni a, tun hi a vawi 38 na a ni. Primary School Leaving Certificate (PSLC) leh Middle School Leaving Certificate (MSLC)/Middle English School Leaving Certificate (MESLC) Examination kum 2011 a tih tawp anih tak avangin Primary leh Middle School tan chuan hetiang hi tih tawp a lo ni tawh a ni.

Vawiina Cash Award for Proficiency in Science & Mathematics 2014 - 2015 sem hi Class IX  leh XI a promotion examination a Science leh Mathematics subject bika ti tha zualte tan pek a ni a, tun kum a lawmman la tute lak dan chu hetiang hi a ni :

Class IX promotion - zirlai 49

Class XI promotion - zirlai 12 an vaiin 61 an ni