1695/2024-2025

Dated Hnahthial, the 22nd August, 2024: Vawiin khan Hnahthial DC Meeting hall-ah Department of Drinking Water and Sanitation leh Ministry of Tourism tangkawpin a an hmalakna, Swachhata Green Leaf Rating chungchanga District Level Committee chu an Chairman leh Bawrhsap ni bawk, Pi Rita Lalnunmawii Pachuau kaihhruaiin neih a ni.

Thutkhawmnaah hian hospitality facilities hrang hrang neitute kalkhawm chu Pi Vanlalmuani, PHE District Coordinator chuan Swachhata Green leaf rating chungchang orientation a neih pui a. He hmalakna hi Department of Drinking Water and Sanitation leh Ministry of Tourism in 'Travel for Life' campaign hnuaia a duan niin khualzinte chawlh hahdamna/thlenna hmun (hospitality facilities) hrang hrang hrang resort, hotel, homestay, dharmshala (TNT, home etc) etc. ten faina lama kaihruaina duante a zawm that leh that loh tehna tura duan chhuah a ni.

Swachhata Green Leaf Rating hnuaiah hian rating system hi thuang thuma then a ni a. A hmasa ber chu orientation phase niin hetah hian SBM-G team leh Tourism Department te chuan district tina hospitality facilities ho thlang chhuakin a list an siam ang a. State in chung a thlan chhuah ho bik hnenah chuan training pe tura ruahman a ni. A thuang hnihna chu Voluntary Declaration Phase niin hetah hian thlanchhuah hote chu training pek an nih hnunah endikna tura tehkhawng an duan hmangin an mahni in an in teh phawt ang a. Rating chu Current Certification Status(CCS) atan chhinchiah a ni ang. A thuang thumna chu Verification Phase niin hetah hian Verification Sub committee chuan CCS format chu endikin photo/video thehluhte chu endikna hmanrua nen an ennawn leh dawn a ni. Survey atanga an thil hmuhchhuahte chu rating certification chiang taka pe in hospitality entities te hnenah an ti chhuak ang a. Hei hi hospitality entities te chuan an duh chuan an sumdawnna hmunah an tarin an sumdawnna branding atan an hmang thei nghal bawk dawn a ni.

Rating hi chi thum siam niin chungte chu 1-leaf status, 3-leaf status leh 5- leaf status te an ni a. Heng zingah hian 5- leaf status chu sang berin 1- leaf status chu a hniam ber a. Leaf status pek nan hian scoring system pathum - Solid Waste Management (SWM) (Bawlhlawh sakhat sawngbawl dan), Faecal Sludge Management (FSM) (ek thli sawngbawl dan) leh Greywater Management(GWM) ( Tuichhe sawngbawl dan) te chu hman niin mark hmuh theih zat hi avaiin 200 a ni ang a. FSM leh SWM chuan mark 80 pu ve ve in GSW chuan mark 40 a pu thung ang.

Leaf status hmu tur hrim hrim hian a lo berah heng scoring system zinga pakhat talah hian mark zaa 50 tal hmuh ngaiin 1 star leaf status hmu tur chuan mark 100-130 hmuh a ngai a. 3- star leaf status hmu tur chuan mark 130-180 hmuh ngaiin 5 star-leaf status hmu tur chuan mark 180-200 hmuh a ngai thung a ni.

Thutkhawmnaah hian Swachhata Green Leaf Rating neih tur atana Verification Sub committee members turte chu ruat nghal niin Chairman atan SDO (Sadar); Member Secretary atan PHE SDO leh members atan YMA Sub Headquarters President, Hnahthial District VC Association President leh Lunglei Tourism department atang official pakhat te chu awm tura ruat an ni a. Self rating hi September ni 15 hmain Verification Sub Committee hnenah submit tur niin anni hian verification an nei ang a, hemi zawh hian District Level Committee chu thukhawm lehin rating hi final approval an lo pe dawn a ni.

He thutkhawmnaah hian Addl DC Pu Zothanmawia Khiangte, DRDO Project Director Dr Malsawmtluanga Fanchun, SDO (Sadar) Pi Esther Leihang leh Pi C.Rolianthangi, ATO, Tourism te chu an tel a ni.