1694/2024-2025

Champhai, 22nd August 2024: September ni 5, 2024-a ‘Zirtirtute Ni’ hman dan tur relin vawiin khan Champhai District Working Committee on Celebration of 62nd Teachers’ Day chu an Chairman, Bawrhsap Pu VL Remliana hoin DC Conference Hall, Keifangtlangah an thu khawm.

He hunah hian thutkhawm kaihruaitu Pu VL Remliana chuan kalkhawmte inlawmna thu sawiin, zirtirtu hna chu hna zahawm leh ropui tak a ni, a ti a. Ropui taka Zirtirtute Ni lawm a nih theih nan member kalkhawmte chu an ngaihdan thawh turin a sawm a, he mi hnu hian rorel tan a ni.

Champhai District Education Officer (DEO) Pu C. Lalbiakzauva hnen atangin nikum (2023) lama Zirtirtute Ni hman dan report tawi ngaihthlak a ni a. Sawrkar leh mimal enkawl sikula zirtirtu zawng zawng te chu National Teachers’ Welfare Fund (NTWF) hnuaiah kum tin cheng 200 senga an inziah luh thin tarlangin; NTWF-a inziaklutte chu damlohna leh vanduaina an tawhin cheng 30,000 thlenga tanpui theih an nih thu a sawi a, zirtirtute chuan he Fund hi tangkai taka an hman a duhsak thu a sawi bawk.

Vawiin thutkhawm chuan Zirtirtute Ni lawm dan tur chu sikulte zalenna ah a dah a. Sikul tin ten an remchan danin, a malin emaw; a huhovin Village Council, NGO, Students’ Union, School Management Committee etc te kaihhruaina hnuaiah an hmang thei ang. Sawrkar Official-te pawh hmanna tur hmun bik siam sak an ni lo a, sawm an nihna hmun apiangah an hmang thei ang. Zirtirtute Ni pual hian Cable TV leh Social Media-a pek chhuah tur ‘Zirna chungchang sawihona’ (Panel Discussion) buatsaih tum a ni a, Champhai khaw chhung hmun hrang hrangah Standee leh Banner tar chhuah tum a ni bawk.

Champhai District Working Committee on Celebration of 62nd Teachers’ Day hian Mizoram State Award to Teachers 2024 dawngtu Pu C. Lalhrilliana, Teacher, Govt. Vengthlang Middle School, Champhai chu chawimawina hlan tha an tih thu an rel a. Lawmpuina hlan dan tur hi District Education Committee kutah an dah a ni.

Vawiin thutkhawmah hian sawrkar official-te bakah Joint VC, YMA, MHIP, MJA, MZP leh District chhunga zirna lam kaihhnawih pawl hrang hrang aiawhte an tel a ni.