1693/2024-2025

Dated Serchhip, the 22nd August, 2024: Thenzawl khaw chhungah thianghlim zawka Sa leh chawhmeh zawrhchhuah a nih dan tur ngaihtuahin vawiin khan Sub Divisional Officer (Civil) hovin meeting neih a ni.

Vawiina SDO (C) Conference Hall Thenzawl a meeting neih hi Pu K. Lalhlimpuia Sub Divisional Officer (Civil) Thenzawl Civil Sub-Division chuan a kaihruai a. Hun hmasa lamah SDO(C) office chu a hmunah thutchilh a nih loh avangin tih tur awm tak tak tih loh a awm ang tiin, khawtlang hmasawnna hrang hrang a tihtur awmte a hmuna a thutchilh hnuah hmalak chhoh zel tum a nih thu a sawi a. Faina chungchang ah tan lak a tul thu te, ruihhlo dona kawngah tan lak a tul thute sawiin Thenzawl khuain hma a sawn zelna turin tun hun thlir mai lova kum 50 hnu lam thlir chunga ngaihtuahna seng thar turin khawtlang hruaitu kalkhawmte a chah a ni. Khawtlang hmasawnna turin khawtlang hruaitute, tlawmngai pawl hrang hrang hruaitute nena thawhona tha tak an neih a tul thu sawiin, an hmalakna zel turah thawhchhuahna tam tak a awm dawn avangin rilru zau tak pu chunga thawho puiah a sawm bawk.

Vawiina-meeting hian Thenzawl khuaah thianghlim zawka Sa hralhchhuah a nih theih nan tuna sa zawrhna awmsa atangin thla thar atang chuan Commerce & Industries Department hnuaia Thenzawl East Market building ah insawn tura ngen leh hriattir nise an ti a, a tul anga thuchhuah siam nise an ti a ni. Thianghlim zawka Sa talh a nih theih nan Thenzawlah Sa talhna hmun 'Slaughter House' a awm ngei theih nan hmalak ni se an ti bawk. Sa zawrhna bakah hian kawngpui dunga chawhmeh zuar chhuak thin te pawh Thenzawl East Market Building ah hian insawnlut vek tura ngen leh hriattir ni se tiin, hemi kawnga hma la turte an inruat nghal bawk a ni.

Vawiina meeting-ah hian AH& Vety Department aiawh bakah Commerce & Industries Department aiawhte, Thenzawl Joint VC, Thenzawl East VC, Thenzawl Kanan VC, Thenzawl Joint YMA leh Thenzawl Sa Ser Association hruaitute leh chanchinbu mite an tel a ni.Meeting zawh hian SDO(C) ho hian Thenzawl East Market building hi tlawh nghal a ni a. Slaughter House sak na hmun tura an sawi lan te a hmunah an tlawh nghal bawk.