1898/2023-2024

Tukin dar 7:00 khan Project Management Unit, PHE Department bultumin Mizoram chhung atana hman tur Swachhata Hi Seva (Faina Beihpui thlak) 2023 hawnna inkhawm Vanapa Hall kawt-ah hman a ni a, PHE Department Secretary Pu C.Lalremsiama’n hawngin hemi puala kawngzawh a vailiam nghal a, hawnna programme-ah hi PMU PHE Department Director Pu H.Duhkima’n kaihruaiin, PHE Department thawktute leh sawm bikte’n kawng hi an zawh a ni.

Hawnna inkhawmah hian thuchah sawiin khuallian Pu C. Lalremsiama chuan Swachhata Hi Seva (SHS) hian a tum ber chu mi zawng zawng hi tifaitu an lo nih theih nan, fai tura vantlang thawhhona buatsaiha harhtharna thlentir a, chumi zarah chuan mipui lamin faina beihpui (movement) an kalpui reng theihna tura hmalak hi a ni a ti a.

Swachhata Hi Seva (SHS) hi kum 2021 September ni 11 atanga October 2 atanga hman tan a nih thu sawiin, hman khat daih plastic chi hman loh (say no to single use plastic) tih thupui hmangin neih a ni a, hemi hun chhung hian faina hnatlangpui (shramdan) khua zawng zawngah neih a ni a, vantlang hmun pawimawh (hatt, bazaar, school, holy-place, etc) te tihfai leh vantlang inthiama te chei that a ni bawk a ti a. Mimal tui chhia leh tawihthei paihna tur tawih khur leh tuichhe khur siam a ni a. He hunah hian khaw hrang hrangah hman khat daih plastic hmang tawh lo tura intiamkamna (resolution) neih a ni bawk a ni, a ti.

Khuallian chuan nikum 2022 khan "Khaw chhung lang theia fai taka siam" (visual cleanliness in village) hman tih thupui hman a ni a. Kumin 2023 hian, ' Bawlhhlawh awm lo India (Garbage free India)' tih thupui hmangin India ram pumpuiah September ni 15 atanga October 2. 2023 chhung hian neih leh tur a ni a ti a. Kumin thupui hian uar taka au chhuahpui tur a thlan bik te chu, 'khawilaia inthiar/e awm lo tura tan lak (ODF sustainability)' leh plastic paih hnu awmze neia seng hawi (Plastic waste management)' te hi a ni dawn a ni a ti.

Swachhata Hi Seva hi kumtin thupui hran neiin rampum huapa hman ṭhin a ni a, kumin hian ‘Garbage Free India’ tih chu thupuiah hman niin, he thupuiah hian Open Defecation Free (Pawn lera inthiar awm lohna) vawn nun bakah ṭawih theilo bawlhhlawh umbo dan tur kawng hrang hranga in zirtirna te kalpui tum a ni.

He Faina Beihpui Thlakna kawngzawh hi Aizawl mai bakah District tinah Deputy Commissioner leh District hotute kaihhruaina hnuaia hman ni bawkin hmalakna an neih tum zingah khawchhung hmuh theiha fai taka siamte, khaw chhung bawlhhlawh ṭawphnawk thenfaite, bawlhhlawh ṭawihthei leh thei lo thliar hran inzirtirte, bawlhhlawh ṭawihthei lo sawngbawl inzirtirna te, bawlhhlawh ṭawihthei lo khawnkhawmte, kan tui tlan hnar leh a vel bawlhhlawh laka fihlim tura inzirtir leh a hna siamtu a bulhnaia thingphunte, hman khat daih plastic in harsatna min thlen dan bakah hmang lo tura mipuite intiamkamna neih puite leh pawn lera inthiar awm tawh lohna tura khawtin a VC te zawng zawng thawhpuite a ni.

Hemi hun chhung hian District, Block leh Sub Division ah te kumin a thupui hman hmang hian inzirtirna hrang hrang neiin beihpuithlak a ni ang.

Swachhata Hi Seva (2023) hnuaiah hian hmalakna tur (activities) hrang hrang a hnuaia tarlante hi chhawpchhuah a ni :

1. Khaw chhung hmuh theiha fai tak a siam.
2. Khaw chhunga bawlhhlawh tawphnawk awmna thenfai
3. Bawlhhlawh tawih thei leh thei lo a chhuahna (source) atanga thliar hrang tura inzirtir.
4. Bawlhhlawh thliar hran lohte dahkhawmna tur hmun sak (15FC, MGNREGNA etc).
5. Bawlhhlawh paih motor, tawlailir leh remchang dang hi Government E-market (GeM)hmanga lei theih tura hmalak
6. Bawlhhlawh tawihtheilo heng plastic ang chi in tin atanga khawnkhaw'm
7. Kan tui tlan hnar leh a vel te bawlhhlawh laka fihlim tura in zirtir leh a bul velah thingphun.
8. Gram sabha kaltlanga hman khat daih (Single use plastic) plastic in harsatna min thlen theih dan leh hmang tawh lo tura intiamkamna nei turin mipui zirtir.
9. ODF plus nih theihna tur atana hmalak dan tur VC te sawipui.
10. In zirtirna thuziah (slogan) leh banga thuziah (wall writing) siam