1899/2023-2024

Aizawl, 15.09.2023: Vawiin khan District AIDS Prevention and Control Committee (DAPCC) leh Mizoram State AIDS Control Society (MSACS) ṭangkawp huaihawtin Vaivakawn Cultural & District Level Red Ribbon School Quiz Competition buatsaih a ni a. He intihsiaknaah hian Presbyterian English School, Republic Veng chu pakhatna an ni.

He hunah hian Aizawl West CMO Dr. Thani Pachuau, DAPCC Vice Chairman ni bawk chuan kalkhawmte lawmna thu sawiin, he competition hian thangtharte zingah nasa lehzuala AIDS chungchang - a darh chakzia te, invenhimna leh fimkhurna a pawimawhna te an lo zirchhuah a beisei thu a sawi a. Zirlai kalkhawmte chu AIDS chungchang inhrilhriatna atan ‘ambassador’ an ni ta tiin, an hun awlah tunlai thiamna hmang tangkaia internet ah hriselna lama anmahni theuh hma an sawn theih dan te ngaihven a, natna hrang hrang laka invenhim dante en thin turin a chah a. Thalaite chu ram innghahna an nih angin thil engkimah an nun vawng uluk a, taksa leh rilru hrisel tak an neih theih nan an nun tichhew thei thil laka invawng thiamnghlim turin a chah a ni.

Red Ribbon Quiz Competition hi sawrkar laipuia Ministry of Health and Family Welfare hnuaia division pakhat National AIDS Control Organisation in ruahmanna a siam angin School, District level, State level leh Regional level ah intihsiakna neih chhoh niin ram pum huap intihsiakna National level thleng neih a ni dawn a ni.

Vawiina District Level intihsiaknaah hian School sawm (10) atangin mi pahnih theuh an chhuak a. Pakhatna Presbyterian English School, Republic Veng hian Rs. 5000 dawngin, 1st Runner Up Govt. Mizo Higher Secondary School in Rs. 4000, 2nd Runner Up Rosebud School, Ramhlun in Rs. 2000 an dawng a; Govt. Zemabawk Hr. Sec. School chu consolation prize Rs. 2000 pek an ni bawk. State Level Red Ribbon Quiz Competition hi September thla chhung veka nei tura ruahman a ni.