4067/2023-2024

Champhai, the 7th March, 2024: Vawin chhun dar 12:00 khan Prime Minister Pu Narendra Modi chuan Sawrkar laipui Ministry of Tourism hnuaia Swadesh Darshan leh PRASHAD Scheme hnuaia project thar 43 khuhhawnna leh project zawh tawh 9 hawnna hun Srinagar, Jammu & Kashmir atangin a nei a, he hun hi India ram hmun hrang hrang 52 atangin video conference kaltlanga zawm a ni a. Project thar kalpui tur tlangzarh zingah hian 'Development at Vangchhia in Champhai District under PRASHAD' tih chu Mizoram atangin a tel a, he programme hi Mizoram atangin Govt. Champhai College Multipurpose Hall atanga zawm a ni.

Hemi puala vawiin chawhma dar 11:00 a Govt. Champhai College Multipurpose Hall-a hun hman Khuallian ni a telpuitu Champhai District Bawrhsap Pu James Lalrinchhana chuan PRASHAD Scheme hnuaia hmalakna tura Champhai District chhunga awm Vangchhia khua thlan a ni chu lawmawm a tih thu a sawi a. Tourism chawilar chu Champhai District hmathlir tam tak zinga lian berte zing ami a nih thu sawiin, tourism chu District leh State ecomomy chawisang thei a ni, a ti a. Mizoram chhunga pipu sulhnu tam ber chu Champhai District chhunga awm a nih thu tarlangin, North East India-a Grape wine siam chhuahna nei awm chhun a ni te, sik leh sa nuam leh hmunhma mawi tak nei a nihnate chu tourism chawilar nana remchang tak a nih thu a sawi a. Champhai District chu ramri depa awm, nitina khualzin mite tlawh leh ngaihven a nih thu pawh sawiin, thalaite chu ngaihtuahna thar senga District-in theihna sang tak a neih chu chhawr tangkai tum tlat turin a chah a ni.

Champhai District Bawrhsap chuan Tourism industry kaltlanga Champhai District chhunga hmalakna kalpui mek leh hmachhawpte tarlangin, District mipuite chu khualhip leh dawnsawng kawnga pawimawhte ngaihvena inpuahchah turin a sawm a. Tawng zir kawnga hmasawnna, tourist guide leh duhthlan tur tam tak awmte ngaihven turin a chah bawk a. Kawngpui tha tak avanga Champhai pan a awlsam tawh thu sawiin, border trade hmang tangkai thei tura tanlak a tul thu a sawi a. PRASHAD project a hlawhtlin theih nana lungrual taka hma la ho zel tur leh rualawhna dik neia ngaihtuahna seng turin project kalpuina tur Vangchhia khuate a chah nghal bawk.

Thusawitu dang Tourism Director Pi R.Lalrodingi chuan Champhai District chu Tourism Industry-a theihna sang tak nei a nih thu sawiin, hmunhma cheibawl kawngah a tahtawk zela hmalak zel tum a ni, a ti a. Khualhip kawnga tanlak a tul rualin anmahni lo dawnsawn leh khualchhawn kawngah theihtawp chhuah tel a tul thu sawiin, inzirtirna neih tam deuh deuh a pawimawh thu a sawi bawk.

He hun hi Pi C. Ramsangzuali, Tourism Officer, Tourism Department chuan kaihruaiin Mizoram Zinmi Rintlak Thutiam (Responsible Tourism Pledge) sawi rual a ni a. Pi Sonia Tirkey, Asst. Director, Ministry of Tourism hnen atangin thusawi ngaihthlak niin, Pu K. Lalruatsanga, Asst. Engineer, Tourism Departmnent-in PRASHAD Scheme kaltlanga Vangchhiaa hmalak tum dan a sawifiah hnuah video conferencing kaltlangin Prime Minister hova ram pum huapa hun hmannaah tel a ni a. Hun hman zawhfel hnu hian Pu F. Malsawmtluanga, VCP Vangchhiain lawmthu sawina hun hmangin an khaw hlutna leh theihna an neihte hriaa tourism lama hmasawnna tura project tha tak an nei tur chu lawmawm a tih thu a sawi a ni.

Swadesh Darshan leh PRASHAD Scheme hnuaiah 'Development at Vangchhiain Champhai District under PRASHAD' hi Ministry of Tourism (MoT) sum cheng vaibelchhe 5.59 senga thawh tur niin, Tourist Information Centre with Public convenience, Care taker cabin Multipurpose Hall, Cafeteria, Kitchen & Dormitory bakah Parking, Solar Panel & Illumination (IS), Rain Water Harvesting Tanks, Waste Collection & Disposal (LS), Compound Wall, Signage (LS), Gate with Security Cabin, 3D Scanning (LS) leh pawimawh dangte siam tum a ni.

Vawiin hun hmanah hian Sawrkar Department hotute, Tourism stakeholder-te, Govt. Champhai College-a Zirtirtute leh Zirlaite bakah Vangchhia VC member-te leh NGO hrang hrang hruaitute an tel a ni.